陳嘉寶復出簽古仔重生 宣示女權新態度:一定要有夢想先有幸福

更新時間 (HKT): 2021.03.14 06:00

模特兒出身的陳嘉寶(Anjaylia)17歲便出道,憑着青春無敵兼一雙大眼睛讓人留下深刻印象,之後曾簽約電視台參與拍劇,多年來發展一帆風順。2017年她毅然跟初戀男友黃頌祈結婚,榮升長洲新抱之後專心相夫教子,兩年抱兩育有一對女兒的Anjay,完成組織家庭的責任後,最近決定重新出發,簽約加盟古天樂的新公司Cool Style,成為旗下第二位藝人,Anjay自嘲是「老新人」、又是Ansonbean的小師妹,她說:「舊年年尾遇返呀Kim(Cool Style老闆之一),佢都仲係好想幫我,我都覺得係時候重生嘞!古先生都係我其中一個老闆,見過面,佢係一個大前輩,都有鼓勵我,真係好期待呀!」

Anjay急於「復出」,皆因去年年尾看過ViuTV的《全民造星III》後突發奇想,並找來她的演戲啟蒙老師彭秀慧:「我有一晚睇完《造星》忍唔住搵咗彭老師,問佢如果我繼續想做會係點呢?佢畀咗好大嘅鼓勵我,話我好適合做呢一行,佢好支持我,聽完之後就『全民做自己』,搵Kim造星。」問她再有新一季《造星》,會想挑戰嗎?Anjay笑說:「淆底!要跟呀Bean學吓跳舞先,希望自己拍到多啲戲唔得閒參加啦,因為呢個舞台都比較殘酷,自己適合喺銀幕表演多啲,呢排有見吓導演,佢哋都覺得我狀態好好,比以前好唔同,我自己都期待新嘅一頁。」

為女兒樹立好榜樣

現年31歲的Anjay外表溫柔,內心卻很強大,認為女性也能兼顧家庭與工作,更希望能夠為兩女做好榜樣:「以前嘅公司好溫室,之後有另一間公司,中間亦經歷咗重組家庭嘅時間,我覺得入面有好多嘢變化,但係我一直保養好自己嘅樣同身形,心態同人生經歷就一路喺度增長,而家足夠成熟。我知道而家嘅藝人都好年輕,但我嘅market比以前更廣闊,而家我可以由10幾歲演到做媽咪、做到老,我有信心。屋企搞得掂,自己出嚟拼搏,係一個好榜樣畀小朋友,女仔可以好叻,兩樣都可以行到,點解男仔就可以兼顧?責任一定放喺女仔身上?我覺得唔係,係可以並存嘅,一定要有自己夢想、做得好先至會幸福。」Anjay又爆自己戲癮大,經常要跟老公角色扮演,老公嫌棄寧願她早點「復出」:「老公知道我好渴望做呢行,一路以嚟都好鍾意做戲嘅,細個做modeling,之前專登去紐約讀一個演戲嘅課程,好多人都叫我拍戲,我成日同老公講再唔做我就枯萎,成日逼佢同我做戲,扮郵差、鄰居,佢覺得好煩同好攰,所以叫我快啲出去做嘢。就算係情慾戲我老公都好open,當睇到演出嚟唔係本身嘅我,算係我嘅目標。」

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner