陳志雲批大台調動節目弊多於利 讚ViuTV走啱路:話題性嚟講已經贏咗

更新時間 (HKT): 2021.03.14 17:07

最近香港電視界爭鬥激烈,大台被ViuTV氣勢嚇到要請曾志偉回巢做高層,掀起一陣熱論。大台近年的綜藝節目被評「一蟹不如一蟹」,主打實況娛樂的ViuTV極速冒起,最近大台更忽然傳將黃金時段劇集變陣,把已開播的《大步走》調到8時半,改由較有份量的陳豪及李佳芯主演《愛美麗狂想曲》頂上,疑似對撼ViuTV 3月22日播出的真人騷《最後一屆口罩小姐選舉》。報道出街後,無綫又「彈出彈入」,回應傳媒指《愛》是接《失憶24小時》棒,於3月22日8時半播映,並非前晚宣傳片段公布的9時半;但就沒有解釋宣傳片內容是否擺烏龍或另有內情,而昨晚宣傳片就索性將播出時間刪掉。

身為無綫前總經理的陳志雲,今日在其YouTube頻道上載短片,仔細分析大台最近的調動及兩台對陣的看法。陳志雲一開始表示:「好高興見到TVB在節目編排上因對手變陣,我開心係因為TVB開始重視ViuTV。我成日都係咁講,有競爭先有進步。」對於近年大台屢屢被人批評,陳志雲分析道:「用一個老闆嘅角度嚟考慮呢件事,大家自然好明白TVB嘅心態。用$10製造一件產品,你都可以攞到市場七成佔有率,用$5製造一件較為差嘅產品,又仍然可以攞到同樣市場佔有率,咁又點會有動力去改善產品嘅質素呢?只會係越做越差。」

陳志雲又以非常肯定的語氣表示大台今次的節目調動的確是針對ViuTV下手,「劇集一向都是TVB最強節目品種,每一次迎戰對台節目嘅時候,都會採用一個雙劍合璧嘅策略,將兩個劇集拍埋一起播放。」不過陳志雲卻認為大台此舉是一步爛棋,「現今呢個編排,毫無疑問TVB對《愛美麗狂想曲》睇高一線,呢個舉動可以見得到TVB真係亂咗陣腳,呢個亦都係一個兵行險着嘅策略。萬一《愛美麗狂想曲》收視未如理想,TVB嘅橋頭堡就保唔住。我所指未如理想收視唔係《愛美麗狂想曲》 輸畀ViuTV,而係贏唔到《大步走》,那就弊啦,咁嘅話,呢個調動真係多此一舉。」

其後陳志雲又分析大台應如何應對:「其實,TVB應該以不變應萬變。而家呢個改動(節目調動),就好似未能全面控制病情嘅長期病患者去接種科興疫苗一樣,弊多於利,風險大於好處。對內嚟講,對同事係一種打擊;對外嚟講,喺夜晚上9:30睇開《大步走》嘅觀眾是一種滋擾;對廣告商嚟講,呢個一定係示弱嘅行為;對對手嚟講,就增加咗人哋聲浪同氣勢,間接為對方做咗個好大嘅宣傳。」

最後陳志雲又表示此舉應不是坊間認為的曾志偉所為,「我可以好肯定唔係佢嘅決定,這個責任應該係落喺余詠珊嘅好拍檔,杜之克副總經理身上,節目編排同劇集製作都係由他負責。講句老實話,以話題性嚟講,ViuTV 已經贏咗。ViuTV 走啱咗條路,用劇集對撼TVB劇集唔係上策,真人騷勝在靈活,勝在唔需要過分依賴大卡士,仲有機會培育一班新人,等觀眾同佢哋一齊成長,話題自然會帶動收視,亦會引起廣告商嘅青睞同注視。已經冇睇免費電視多年嘅我,都有啲心郁郁想睇睇呢個。」

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner