武漢漢炎丨發哥胞姊周聰玲居住大廈有確診排隊2粒鐘等強檢 已打科興唔擔心

更新時間 (HKT): 2021.03.15 12:46
資料圖片

周潤發的逾70歲胞姊周聰玲獨居堅尼地城,近日該區爆出健身群組,病毒鏈在社區擴散,中半山和西半山不少豪宅都爆疫。黃夏蕙昨獲悉老友玲姐居住大廈有人確診,玲姐和其他鄰居都要進行強檢,夏蕙BB馬上致電問候。《蘋果》今日聯絡玲姐,她在電話中說:「係呀,我住嗰棟大廈有人『中招』,大堂貼晒通告要去指定嘅檢測站做強制檢測。」

玲姐昨不敢怠慢,馬上在指定時間內到堅尼地城士美菲路的採樣站輪候檢測,她續說:「噚日都多人去排隊,我都排咗成2小時。之前見多人,我索性去買咗餸,返屋企煮咗嘢食先落樓去。」玲姐最擔心是過了指定時間強制檢測會收告票罰款,所以她非常守規矩,她說:「呢幾日西環封區,交通又亂,我屋企都買定物資,夏蕙BB成日畀口罩我,我屋企又有米,煲粥、煮飯食15日都冇問題。」玲姐表示檢測報告未出,她會耐心等待,「應該冇事。」玲姐原來一個多星期前都去打了科興疫苗,她說:「月尾我都打第二針。」

近日搬往堅尼地城的裕美都擔心區內爆出第五波,她即撤走,今日在電話中說:「我家附近都有健身中心,好彩唔係群組嗰間,我都驚驚哋呀,已搬過去林作度住幾日避疫。」不過疫情不受控周圍走,居住半山麥當勞道複式豪宅的林作家都不一定百分百安全,裕美說:「除咗做嘢,我都唔敢出街。我成日驚自己會『中招』,我身體差,所以都唔會出街食,會好小心。」問到裕美可會打疫苗預防,她斬釘截鐵說:「唔敢打住,唔想做白老鼠。」

此外,大台小花鄧佩儀昨日也在IG story貼出往檢測的相片,她解釋:「因為前幾天在君悅酒店待了3小時,而哪裏有確診,所以來檢測,大家不用擔心。剛檢測完,收到結果前會留在家裏都不會去。昨天看到新聞之後已經立刻預約了,也沒有外出。」

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner