【娛樂人物】樂易玲狠批形象癲返唔到內地 
J.Arie拍邵氏兩劇得四句對白 解約求生

更新時間 (HKT): 2021.03.15 02:00

現年31歲的雷深如(J.Arie)前年簽約邵氏,上月突然提前解約。日前J.Arie在觀塘接受《蘋果》專訪,大爆「分手」內幕,原來曾獲提名金像獎最佳新演員的她,在邵氏年半只拍兩劇,加起來更只得四句對白;慘遭冷待的她自資出歌,因為內容踩界,被高層樂易玲狠批:「個人咁癲係返唔到內地。」J.Arie最後解約求生。

撰文:比華利

場地提供:The Wave

雷深如2012年港大法律系畢業後,翌年即簽約太陽娛樂加入樂壇,成為新人王,前年轉做獨立歌手一度孤苦無依,其後邵氏向她招手,J.Arie以為大樹好遮蔭,與邵氏簽下五年合約,原定到2024年中才約滿,她卻於今年情人節提前解約。J.Arie指加入邵氏初期非常低調,嘗試學做乖乖女配合,不過去年她先後推出歌曲《雙面哈菲》和性上癮為題材的《陰陽道具》,由才女變「性女」嚇壞公司高層,為免雙方對立,J.Arie最後選擇解約求生。終於等到鬆綁,J.Arie也興奮高呼:「冇約嗰一刻,我感覺鬆咗一口氣,我終於可以做《蘋果》訪問喇!」

飛大馬拍攝變遠景

回顧這一年半做邵氏藝人,J.Arie說:「拍過兩套劇,總共有四句對白,其中一套係《非凡三俠》,公司特登安排我飛去大馬拍一場戲,我喺cafe見到Chilam(張智霖),遞本書同佢講『你可唔可以同我簽個名,我係你fans』,最後套劇出街,我變咗wide shot,對白被cut走。另一套係《陀槍師姐2021》大結局嗰集,出場講我殺咗男朋友落口供時爆喊,呢套我有三句對白……出咗三秒,叫做同陳豪、宣萱同場。」J.Arie兩次演出的角色完全沒發揮,跟路人甲冇分別。

J.Arie坦言前年年中簽約邵氏時,仍未清楚音樂路向:「前年尾屎忽痕寫咗一本『誠實日記』,認清自己原來係咁,接連創作咗《雙面哈菲》同《陰陽道具》兩首歌。」清晰自己路向後,J.Arie不想創作商業歌,只想隨心而寫,但這些作品都被評為精神病系列,要她勉強綁死在邵氏,相信只會兩敗俱傷。J.Arie於是跟高層樂易玲傾談解約:「我同樂小姐講『我同公司direction咁唔同,可唔可以放生我』,佢覺得我做嗰啲歌,搞到個人咁癲,好唔正面,係返唔到內地。樂小姐都應該預計唔到我咁癲,養住我都影響到佢哋,擺我入佢啲劇係返唔到內地。」

唔介意40歲再嚟過

J.Arie此刻最大心願,是明年能夠出碟,及開一場演唱會。現在離巢,成功掙脫枷鎖,她自覺距離目標近了:「我唔使再扮斯文,完全做返自己,索性再由零開始。」高考考獲2A2B的J.Arie算是高材生,更是從港大法律系畢業,不過未能學以致用:「當年唔理父母反對要入行做音樂,我唔覺得好嘥,將來走投無路。我先返去做律師。最初入行,我係有10年計劃,到𠵱家都過咗八年。我個timer想從頭計過,我𠵱家31歲,到40歲時再睇吓點,或者到時再讀返個法律牌,即使40歲入律師樓做junior俾人使,我都唔介意。」

在圈中浮沉八年的J.Arie除習慣了辛酸,還學會釋懷:「只要唔同人比較,唔去諗人哋點樣,自己就唔會去流一滴眼淚,不過有時我都會無端端沖涼時喊咗。人人都有辛酸,但我哋好多時只睇到人哋風光,千祈唔好唔小心比較咗,我只係同自己比較,希望今日比噚日進步。」

娛聞樂陪你走遍全球追星,即Like「娛果」FB 專頁!
BannerBanner