ERROR為「負心保錡」求情 偷食爆粗作借鏡告誡小心做人

更新時間 (HKT): 2021.03.17 06:00

男子組合ERROR出道至今以騎呢見稱,但背後才華凝聚,出道短短3年除了唱歌、演戲、主持,還做棟篤笑開騷,成功開拓另類巿場,近日更升格擔大旗揀女做真人騷導師。事業起飛之際,卻因成員保錡「偷食沙律」張沛樂成負心漢,又不忿被嘲「少年八両金」與網民爆粗開火,旋即「累街坊」牽連ERROR名聲,至上月保錡始知衰跪低,公告暫別ERROR。幸而兄弟患難見真情,三子齊齊幫口補鑊求原諒,爆保錡面對挫敗「精神失常,覺得人人都憎佢、攻擊佢。」此舉令組員引以為鑑,「唔好以為自己係ERROR就咩錯事都做得出。」

為保錡求饒

ERROR出道後效力ViuTV保持一定工作量,最近被委派為選美真人騷《最後一屆口罩小姐選舉》擔任導師教路,日前三子肥仔(梁業)、193(郭嘉駿)、阿Dee(何啟華)在九龍灣接受訪問,宣傳四缺一獨欠保錡,隊友還是對他不離不棄,合照時仍留下一個空位給他,寓意盡快歸位。雖然保錡已為「偷食」及「爆粗」公開認錯,不過網民懶理唔收貨,反對聲音未曾熄滅,日前節目宣傳一出,網民繼續狙擊唱反調。幸好獲兄弟力挺,無懼節目出街惹負評,支持保錡翻身,阿Dee說:「保錡自己擔心拖累我哋所以自發性離開,我哋唔會咁諗,我哋心靈上好支持佢企返起身。」193則鼓勵保錡認錯再企起身,「個個人都有錯㗎啦,希望觀眾可以畀時間佢同原諒佢,遲啲出返嚟都唔好再鬧佢,佢真係認咗錯,希望畀機會保錡。」肥仔更是語重心長:「呢個時期錯,對佢反而有幫助。人唔經大事唔會醒覺,正如而家起步有挫折仲可以起返身,呢個係好時機,保錡件事提醒咗我哋要樣樣小心。」從而令三人借鏡,193說:「件事上我哋三個都學到嘢,唔好以為自己係ERROR就咩錯事都做得出,以前以為ERROR冇形象又冇人識,點知咁多聲音,可以小ERROR,唔可以大ERROR。」

自嘲食沙律減肥

保錡仍有繼續開工,將完成手頭上《ERROR自肥企劃》和《最後一屆口罩小姐選舉》工作後正式暫別,四子緊密聯繫,193爆保錡在旺角鬧巿開工精神失常,「佢覺得所有人都憎佢攻擊佢,嗰輪非常嚴重,要經理人拉埋佢一邊,佢真係嬲怒嗰種。」肥仔說:「佢而家情緒好啲,之前喺街見人望佢就話:『肯定人鬧緊我啦,又想影我擺上網。』後來會自嘲講笑,話呢排減肥食沙律,就知佢好返啲。」肥仔亦師亦友勸告保錡:「Hater全世界都有,唔會全世界人鍾意你,人哋憎你時就會中傷你,放低啲唔好睇咁多,思想正面啲。」組員傾盡全力為保錡補鑊,希望4子再並肩作戰,阿Dee十分了解兄弟,「睇佢能否面對大眾,佢未ready。一個半個留言鬧佢,佢都好認真,咪自己難受,希望佢心理質素企穩咗先。」193送上冷嘲熱諷激勵:「相信保錡到60歲都有人笑。」

對女學員難捨難離

ERROR今次為節目揀出20位參賽者一決高下,每人率領5位學員,令大家回想參加《全民造星》時的畫面,日前大家交流審美準則,阿Dee旗下有才華靚女、有身材、玩性格等五花八門參賽者。193主力不揀靚女,但偏愛白皮膚女性,以合眼緣為主。肥仔則對短髮及豐滿型女性情有獨鍾,被取笑是「鹹濕仔」。節目透過參賽者自選表演選拔入圍,內容略有驚喜,「有中醫師表演針灸、拔罐,又有跳彈床,黐線過《全民造星》。」

ERROR以過來人身份給予貼士,提示學員切忌只顧表演忽略說話,肥仔說:「話明真人騷,唔講嘢等於冇鏡頭。」193說:「喺鏡頭前唔好只係默默耕耘,觀眾睇唔到你性格同存在,譁眾取寵都要令人睇到你。」在真人騷拍攝時,他們和學員日久生情,當了解參賽者抱負和目標後,不忍親手淘汰,有難受一刻。三人面對女學員不怕傳緋聞,193會與女學員刻意保持距離,肥仔則不介意送上愛的抱抱,還笑193:「你有邪念先諗保持距離,跳舞都有肢體動作,等同打招呼或goodbye kiss。」此外,ERROR在疫情下仍工作不斷,他們笑稱是季節性藝人,在電視台背後仍可各自經營理想。

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner