陳葦璇葉巧琳感恩成功得來不易 十年後嫁咗都想繼續唱

更新時間 (HKT): 2021.03.16 06:00

25歲的陳葦璇與36歲的葉巧琳(Mischa),兩年前還只是個耳熟卻印象模糊的歌手,去年一個真人騷《全民造星III》,令她們重新聚焦觀眾的視線,讓兩人成為有聲有畫、有血有淚的藝人。尤其她們以《給十年後的我》為主軸的演出,不少網民看罷被深深打動,這次她倆再次重聚,回想這十年,你們無悔驕傲嗎?

Mischa不假思索便說:「無悔,我鍾意唔容易嘅一條路,我好享受個過程。」接着,她問身旁的陳葦璇,假如重頭選擇,希望一炮而紅還是按部就班?陳葦璇說:「我想好似而家咁,如果嗰時一炮而紅,我唔會試咁多嘢,況且我都係25歲啫。」身為「姐姐」的Mischa即翻翻白眼,她坦言感激一直走過的路:「我哋都行咗好遠嘅路先嚟到今日,但係值得嘅。如果一開始已經有好多注視、反應好好,我唔知自己會唔會好似今日咁humble?中間會唔會跌得更快呢?所以我唔介意等待。」Mischa透露去年是她遇到的第二個迷惘期:「2020年由疫症開始喺度等,唔知等乜嘢,個人迷迷糊糊咁,又冇job又冇收入,直到參加《造星》先守得雲開見月明。」

陳葦璇自嘲她的迷惘期既多亦密集,原本獨自到台灣,邀得當地的音樂人合製四首歌,後來她的簽證到期加上疫情,被迫「滯留」香港:「嗰時諗到底要等去台灣好,定喺香港搵啲嘢做住先維生呢?唔知自己做緊乜,呢個迷惘過程我諗人人都會有,最開心係喺呢個過程搵得返自己想做乜,或者試多咗唔同嘢,無論啱唔啱自己都好。」

兩人直言參加《造星》後,至少找到方向和目標,Mischa感恩有這個機會演出:「呢個比賽令我哋不停有機會表演,我哋係好幸福。」她認為最重要是找回初心,從前誤打誤撞走進娛樂圈,有無形的框框限制自己:「原來個舞台可以做咁多嘢,可以天花龍鳳都得,點解我哋表演者成日要迎合外間嘅規限呢?」陳葦璇覺得入行後,派歌都是正正經經宣傳,卻從未像《造星》時,為每首歌嘗試加入那麼多不同的元素,令她大開眼界。

區區幾場成敗裏 應該不至麻木了吧

十年人事幾番新,回想過去,她們都迷失過,星途絕對稱不上是一片光明,面對種種不像預期的狀況,陳葦璇和Mischa有麻木過嗎?陳葦璇坦言很愛以前的自己:「我幾鍾意以前嗰個盲舂舂、有股儍勁嘅自己。而家個人冷靜咗好多,雖然經歷好多,但係內心仲有呢個小女孩,先可以繼續咁堅持嘅性格。」以女子組合As One成員出道的她,兩年後以個人身份再出發,由陳嘉茵改名陳葦璇,她說:「女團係好機械式,直到我自己solo嗰陣,我覺得自己仲係停留喺好女團嗰個模式,唱跳都唱到自己冇咁興奮,撳個掣就嚟啦。」

陳葦璇更帶來十年前參加全港中學校際歌唱比賽的亞軍獎座,對她來說意義重大:「呢個係我人生第一個亞軍,嗰陣時唔識唱歌,但係10歲開始跳拉丁舞,比賽嗰陣係15歲。跳拉丁舞嘅特色係好pull up、好有自信,所以無形中將我嘅拉丁舞融入喺唱跳入面。」她笑謂當時只是小女孩,從未想過自己的自信會令人覺得囂張:「嗰時淨係覺得自己好enjoy囉,可能有啲說話,大人聽到唔係好舒服,鍾意我嘅人就好鍾意,唔鍾意就覺得我氣場太勁囉。」

至於Mischa,十年前她仍在演藝學院就讀,其後組成樂隊Trekkerz:「參加比賽贏咗就加入公司,就係咁直接入咗行。」比陳葦璇早兩年入行的Mischa,自然亦有麻木的時候:「十年前左右喺演藝啱啱畢業,自己又鑽研咗聲樂五年,唱流行曲應該冇問題。入咗行先知自己渺小到一粒塵都不如,根本唔可以同行內人去比,所以嗰時做公仔嗰part(《造星III》比賽項目),阿祖(梁祖堯)問我愛唔愛以前嘅自己,我發覺自己係有少少避,但係其實我應該好好感謝以前嗰個我。」

你還是記得你跟我約定吧

昨日的經歷自然影響今天的心態,曾參與40多個大大小小比賽的陳葦璇,依然嚮往比賽時激發出來的鬥心:「我對獎項要求好低,但係每次比賽都想有進步,我好鍾意參加比賽。」Mischa直言比賽是辛苦的事,不想再參賽:「今次已經搵到我想要搵嘅嘢,唔需要下一個比賽。至於頒獎嗰時,我年紀大,無講同啲年輕人鬥,樂壇亦未必似比賽,應該係分享,百花齊放最好,可以inspire(啟發)大家做更多嘢。」

兩人趁住《造星III》帶來的人氣,早前分別推出新歌,陳葦璇更是首次參與作曲及填詞:「《本日終了》同阿Mi(葉巧琳)首《浸浴》嘅概念好相似,2020我覺得好似困住咗喺香港,喺呢個困局入面,我不斷搵緊啲新嘅方法,例如剪短頭髮、學寫歌寫詞、唔理旁人目光參加《造星》,發掘多啲可能性。」現在,兩人回歸「歌手」身份,既然同屬女歌手行列,可會視對方為假想敵?陳葦璇與Mischa異口同聲說:「唔會,我哋都唔同。」

展望未來十年,Mischa直言一定結了婚:「但係我都一定會繼續唱,死嗰日都會唱。」陳葦璇想像35歲的自己,希望仍然可以跳唱:「希望到時唔好喘氣,仲有嗰個energy。」隔開25與36之間的不是11,是青春。年少多好,還有衝撞闖關的勇氣和時間,然而,年紀漸長亦非愁緒,流走的歲月帶來通透、沉穩與自在。

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner