雪妮雙耳受遺傳病影響失聽力 靠老公及戴助聽器如常生活

更新時間 (HKT): 2021.03.17 23:11

現年76歲、在粵語片時代憑《女黑俠木蘭花》而成為當紅打女的雪妮在去年6月承認約滿TVB,並以健康為由決定息影,有一段時間沒有亮相幕前的雪妮姐,日前為鄭丹瑞主持的網上節目《健康‧旦》擔任嘉賓,在節目上提及自己因遺傳病,在20多年前聽覺已經出現問題。

雪妮姐已經不用再捱更抵夜開工,精神狀態明顯比前飽滿,談到退休後的生活,她笑說:「OK喇,比較悠閒唔會太緊張,你知開工嗰陣時要背劇本,好似啲學生成日要記住,驚唔記得,但係而家唔使做,個人就輕鬆啲。」

曾動手術治理

阿旦亦提到當日雪妮姐退休的其中一個原因,是與聽覺有關,她說:「其實我未入公司之前,聽覺已經有問題,我諗應該係20幾年前嘅事,有一次傾電話時聽得唔清楚,轉咗另一邊耳仔就聽得好清楚,後來有問題嗰邊直情完全聽唔到,事前係完全冇迹象,冇暈,乜嘢問題都冇。」雪妮姐後來發現本來聽力正常的那一邊耳仔也開始出問題,於是與老公唐佳商量後去看醫生,證實患上遺傳性的中耳耳骨硬化。

雪妮姐表示戴上助聽器後,只可以聽到正面傳來的聲音:「如果喺背後同我講嘢,我就會聽唔到,所以我先生一定要陪住我。我唔係全失聰,好似我而家有游水,試過喺泳池,除咗耳機嘅話,其他人大聲啲講嘢,我都可以聽到啲,其實我之前都試過做手術,一隻得,一隻唔得,結果得嗰隻,10幾年後都唔得,而家我兩邊都要戴耳機。」

行埋一邊唔阻路

不過,問到聽力出問題後,她會否擔心日常生活有不便?雪妮姐說:「冇乜擔心,我好好彩,我先生成日陪住我,我聽唔到,佢可以同人解釋。唯一係得我一個人行嘅時候,我就會行埋一邊,因為有啲人講『唔該借借』嘅話,我係完全聽唔到,所以行側啲咪唔會阻到人。有時候,人哋同我打招呼,我都唔知道,我老公會話:『唔好意思,我老婆聾㗎!』」

-------------------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner