張建聲被網民嫌冇禮貌 歡迎進言改善:我人生格言係尊重

更新時間 (HKT): 2021.03.19 20:40

近日張建聲有份演出的電影《一秒拳王》上映,口碑不俗,電影更入圍烏甸尼遠東影展,戲院在限聚令規定下只開一半座位,但票房仍然理想今日專欄作家月巴氏在facebook分享長文,分析張建聲在戲中角色,以及他的演技,稱讚他在戲中只是配角,但仍好專業為角色減肥及增磅,不少網民留言稱讚及支持。但亦有網民留言鬧爆張建聲,指他曾對幕後工作人員沒禮貌,態度甚乞人憎,更直指張建聲「仆街」,張建聲其後回覆該網民,承認自己過錯並留言道歉。

今日《蘋果》聯絡張建聲,對於網民有讚有彈,他坦言︰「首先我好多謝呢段文,有篇文章鼓勵我,我好感恩,衷心多謝大家,我會做好自己。」被力數多項仆街罪名,張建聲解釋︰「可能幾年前我會好嬲,但我而家覺得冇所謂。自問喺片場我係儍佬,入戲時會唔出聲踱步聽歌,可能有人叫我未必聽到。」

今年38歲的張建聲,於2010年入行,他指自己剛入行時不太成熟,脾氣又不好,尤其在2017年演《反黑》招積一角時,人氣急升同時也態度欠佳,他說︰「我承認嗰時唔覺意得罪咗人,所以我喺留言話,當初我得罪過嘅人,我真係要講聲唔好意思。其實有啲聲音係會令你醒覺,我係好welcome。」

他指有次拍群戲時鬧過臨時演員,但從沒對工作人員不禮貌,他說︰「嗰時拍緊一場喊戲,個群眾演員喺度笑,NG咗幾次,我覺得係咪要尊重吓自己份職業先,當時大家都辛苦,所以我真係有鬧人。」而指他對工作人員麻麻,他解釋說︰「我嘅人生格言就係尊重,對工作人員我撫心自問係yes man,經常都會講唔該、多謝,即使你話我假都好,我都會講。」對於今次被網民指摘,他表示會接受批評︰「我出嚟回應,起碼我敢面對,我只係一個普通演員,會做好本份,演好啲戲。」

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner