吳味人生‧家暴丨吳綺莉被親戚嘲笑似爸爸 認有打卓林:我媽都試過一刀插落門度

更新時間 (HKT): 2021.03.19 00:30
吳綺莉的人生歷盡波折,但她口中仍常念着「感恩」。

開講有話「無仇不成父子」,套用在吳綺莉和吳卓林身上也適合不過。1999年11月,26歲的吳綺莉未婚誕下卓林,BB的生父成龍承認自己犯了「全天下男人都會犯的錯」,卻不願承擔責任,從此母女相依為命。

做單親媽媽不容易,吳綺莉自覺是一位盡責媽媽,昔日跟卓林形影不離,即使在上海生活艱難,兼職做裝修室內設計員,都堅持每日接送囡囡返學放學。「以前約客人見面或落地盤時間較彈性,我由佢幼稚園開始,我差唔多每日送返學放學,未停過,冇送嘅唔超過3次。我覺得一係唔好要小朋友,要就盡量做到就做,可能自己細個冇(父母愛),更需要做呢件事。」

潮州人攞起乜就打

但母女之間的分歧未知從何時開始,2015年卓林報警指控媽媽家暴和酗酒,Elaine直認有體罰:「當然有!我諗同佢之間,最大問題就出喺呢度。我屋企係潮州人,同我差唔多年代嘅父母,都係攞起乜嘢就打,鐵衣架、藤條係特登買(嚟打)叫錫住你。我阿媽都打,試過一次去廚房,我都唔記得自己做錯乜嘢,好彩閃得快,唔知做錯乜嘢,想返入房,一把刀插咗喺門度。」問到可有擔心整傷?Elaine淡定地說:「我唔知呀,但我嗰吓閃得好快,唔知係咪避慣咗。」Elaine蠻不在乎,帶笑續說:「我嗰代同朋友傾開偈,大家都有唔同方法去擋呢啲嘢,真係年代唔同咗,以前老師都打你,而家告硬啦,學校都玩完。」對於酗酒,她解釋:「Wine之外,其他烈酒都唔飲,只係俾人影到買支酒就咁講,用最簡單嘅common sense,如果我屋企好多酒,就唔使夜麻麻去買啦。」

其實卓林的黑暗世界,從她兒時的繪畫作品中已略見端倪。「佢複雜好多。我好細路哥,畫畫係為興趣,朋友都笑我啲畫咁白癡,以前喺上海開畫展,見到牆上嘅畫望到陽光就會好開心,人生好多唔同嘅嘢發生,如果望落去好灰,我會覺得好辛苦。而卓林7、8歲後就好dark,以前好開心,我有教佢畫畫,但佢有自己一套,我細個學國畫開始,國畫喜歡臨摹,抄太多冇咗自己,所以家長都要留意,畫畫有咗基本功之後,就應該畀小朋友發揮自己style。」可擔心女兒的內心世界?她說:「第一性格,第二朋輩都有影響,佢就畫佢自己想畫嘅嘢,我唔反對,每人有自己風格。」

問到卓林是否曾被同學排擠?Elaine說:「有講過,我唯一最大忽略嘅嘢,我嗰方面獨立係自細培養。我父母喺我1歲就離婚,覺得父母無論開心唔開心,離婚都唔好喺小朋友面前數落對方。全家都話我個樣似爸爸,訓練出嚟,成圍枱食飯,會有長輩……冇唔開心,但到現在大個都好,對長輩有啲避忌,哈哈哈,(有長輩)用上海話同我阿媽講:『你真係慘,同你老公離婚,仲要帶住同你老公一樣樣嘅女。』我就坐喺度望住,冇乜反應,我冇唔開心,點話我都好,唔上心,你鍾意點講就點講,我諗性格啦!」

卓林失蹤6個月:幾恐怖幾驚

兩代鴻溝,或許Elaine教導子女的方式有偏差,但仍是很關心對方。年前卓林與太太Andi離港「失蹤」近半年,忽然在網上拍片尋父,Elaine當時心情既驚且喜:「朋友send畀我,我由細到大最難嘅一種經歷,我諗所有父母都唔知會點。當時佢失蹤咗6個月,冇人搵到佢,音訊全無,打畀人哋(Andi)屋企都聽電話,我隻貓好整蠱,每日對住我塊鏡係咁叫,所有人搵唔到,一搵到就係睇到條片。嗰6個月唔係傷痛,而係幾恐怖幾驚,嗰段時間幾難過。」

卓林今年已經21歲,再一次離家,與媽媽超過一年沒見面,只靠短訊聯絡,吳綺莉的家亦只剩下她和兩隻貓,及一位工人姐姐。問到現在可會接受Andi成為一家人?Elaine說:「我有個底線,啱與唔啱都好,現在冇乜嘢講。」談及卓林會否覺得她不對,Elaine坦言「最錯個位係惡同嚴」,問到可有希望母女團聚?她說:「控制唔到,屋企人都難控制佢出街識咩人啦。但我最希望佢自己返嚟,我係基督教,相信有命定,好多唔係我可決定控制去改變。」

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner