吳味人生‧愛情丨吳綺莉傳向成龍索天價養女:做人問心無愧就OK

更新時間 (HKT): 2021.03.19 00:30

成龍大前年推出自傳英文版《成龍:還沒長大就老了》,自認是「混蛋」,驚爆曾睡過10幾個應召女郎,更論盡身邊女人,當中包括鄧麗君、林鳳嬌、吳綺莉。吳綺莉的半生,彷彿與成龍牽扯着,餘下的仍然放不低。

所謂18歲卜卜脆,當年正是18歲的吳綺莉被成龍展開猛烈追求,拒絕過,但最後仍是敵不過「大哥」的豪氣和痴心,可惜一切美夢一下子變成噩夢,就在她懷有「小龍女」5個月後,成龍突然變臉中斷一切關係。有沒有後悔生卓林?吳綺莉堅定不移說:「我個人有一樣好處,每個經歷同過程都係學習,唔會後悔同埋怨,因為對件事冇幫助,冇人教,但我由細到大對任何嘢都係咁,幾難過都好,唔好埋怨同後悔,嘥自己時間。」當時有沒有人勸告要落了小孩?她說:「我匿到自己好埋,大部份自己諗(生下來)。」

自認戀愛大過天

吳綺莉承認自己是戀愛大過天的人,凡投入一段感情,便無悔地愛。「唔怪我個女,細個我都係拍拖大過天。陳翹英係亞洲電視戲劇組製作總監,多謝佢相隔30年都搵我拍《理想國》,佢一定覺得我細個時候好曳,《勝者為王》第一輯,我就係因為拍拖大過天,成日都話要減戲份,問可唔可以唔拍,細個基本上所有時間都係用嚟拍拖。」

曾經有人質疑吳綺莉生卓林是為了箍住個男人,又傳要勒索天價養女,謠言滿天。究竟當初吳綺莉是追求愛情,還是為錢?她避談說:「我份人從來唔理人點睇,亦唔想解釋,我只係一個演員,埋位有好角色好劇本好開心,私人時間係我自己,做人問心無愧就OK,唔需要解釋同交代,我選擇咗自己嘅一條路,就要自己諗點樣行。」

擁有22億身家的成龍,曾公開表明一毛錢也不會分給她們,那吳媽媽有沒有向成龍索錢?她說:「呢點我唔清楚,我真係唔明,現在好多單親媽媽,生佢都要諗點樣令佢成長,我唯一缺失係我太嚴太惡,other than that,我覺得我ok,有啲位我proud of自己,單親又有乜問題。」

成龍之後一直單身

吳綺莉一直保持單身,對於有指她搶走梅艷芳兩個男人趙文卓和林國斌,她笑言都是「流料」得啖笑:「趙文卓都話拍過《黃飛鴻》,見過識得,林國斌真係見都未見過。嬲?冇。」要展開一段新感情,對她來說不容易,因為要顧慮的事情實在太多。「我又唔係只拍過一次拖,過咗去唔講,我之後都有人追,但都忙,有咗個女,到你下次拍拖就有不同要求,可能我諗多咗,人哋要求我要小朋友,我要唔要呢?對我小朋友唔fair,嫁鬼佬會好啲,但中國人思想,真係錫自己嗰個多啲,對自己小朋友唔公平,好似out of family咁,諗到呢點就唔好害人。又或搵個離過婚大家都有細路⋯⋯自己(諗法)好複雜。」她不介意單身,眼見好多差不多年齡的高質素朋友,即使沒結婚生小朋友,仍能活得好開心,一切隨緣。

戲劇性的人生,會否考慮出自傳?她笑說:「自轉就會,冇特別諗!反而想再開畫展,講咗兩、三年,但畫畫都要講mood。話我人生多波折?我都有問過牧師,佢就話點解你係椰菜,佢係菠菜,咁你而家係椰菜就將佢做到最好,唔使諗其他嘢。」滿心玄念,確實要好好參透。

後記:

吳綺莉(Elaine)47歲已嘗盡人生五味,訪問當日,Elaine選擇在半山豪宅家中,一個她覺得最舒服的地方。Elaine從小在單親家庭中長大,可說從來沒有感受過父母的愛,囡囡卓林跟她走一樣的路。回頭一看,Elaine口中常常唸着「感恩」,自言不敢奢望太多,只求平平淡淡過一生。《蘋果》將分兩日,推出五章細談Elaine的半生情、她的成長背景、參選亞姐經過、跟爸爸心結解開,及她與卓林、成龍之間不可分割的關係。

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner