【娛樂人物】吳綺莉 坎坷人生求平淡

更新時間 (HKT): 2021.03.20 02:00

47歲的吳綺莉(Elaine)已嚐盡人生五味,日前她於半山豪宅家中接受訪問,細談自己的半生情、成長背景,及她與卓林、成龍之間不可分割的關係。Elaine從小在單親家庭中長大,囡囡卓林跟她走一樣的路,Elaine自言不敢奢望太多,只求平平淡淡過一生。

撰文:嵐山

攝影:沈健程、陳慧安

開講有話「無仇不成父子」,套用在吳綺莉和吳卓林身上也適合不過。1999年11月,26歲的吳綺莉未婚誕下卓林,BB的生父成龍承認自己犯了「全天下男人都會犯的錯」,卻不願承擔責任,從此母女相依為命。做單親媽媽不容易,吳綺莉自覺是一位盡責媽媽,昔日跟卓林形影不離,即使在上海生活艱難,兼職做裝修室內設計員,都堅持每日接送囡囡返學放學。「以前約客人見面或落地盤時間較彈性,我由佢幼稚園開始,差唔多每日送返學放學,未停過,冇送嘅唔超過三次。」

認體罰卓林「屋企係潮州人」

但母女之間的分歧未知從何時開始,2015年卓林報警指控媽媽家暴和酗酒,吳綺莉直認有體罰:「當然有!我屋企係潮州人,同我差唔多年代嘅父母,都係攞起乜嘢就打,鐵衣架、藤條,我阿媽都打我,試過一次去廚房,我都唔記得自己做錯乜嘢,想返入房,一把刀插咗喺門度。」問到可有擔心整傷?吳綺莉帶笑續說:「我嗰代同朋友傾開偈,大家都有唔同方法去擋呢啲嘢,真係年代唔同咗,以前老師都打你,𠵱家告硬啦。」對於酗酒,她解釋:「Wine之外,其他烈酒都唔飲,只係俾人影到買支酒就咁講,用最簡單嘅common sense,如果我屋企好多酒,就唔使夜麻麻去買啦。」

問到卓林是否曾被同學排擠?吳綺莉說:「有講過。我唯一最大忽略嘅嘢,我嗰方面獨立係自細培養。我父母喺我一歲就離婚,全家都話我個樣似爸爸,成圍枱食飯,會有長輩用上海話同我阿媽講:『你真係慘,同你老公離婚,仲要帶住同你老公一樣樣嘅女。』我就坐喺度望住,冇乜反應,點話我都好,唔上心。」

兩代鴻溝,或許吳綺莉教導子女的方式有偏差,但仍是很關心對方。年前卓林與太太Andi離港「失蹤」近半年,忽然在網上拍片尋父,吳綺莉當時心情既驚且喜:「朋友send畀我,當時佢失蹤咗六個月,冇人搵到佢,一搵到就係睇到條片。嗰六個月唔係傷痛,而係幾恐怖幾驚,嗰段時間幾難過。」卓林今年已經21歲,再一次離家,與媽媽超過一年沒見面,只靠短訊聯絡,吳綺莉的家亦只剩下她和兩隻貓及一位工人姐姐。問到現在可會接受Andi成為一家人?吳綺莉說:「我有個底線,啱與唔啱都好,現在冇乜嘢講。」談及卓林會否覺得她不對,吳綺莉坦言「最錯個位係惡同嚴」,問到可有希望母女團聚?她說:「控制唔到,我最希望佢自己返嚟,我係基督教,相信有命定。」

誕女箍成龍「問心無愧就OK」

成龍大前年推出自傳英文版《成龍:還沒長大就老了》,自認是「混蛋」,驚爆曾睡過十幾個應召女郎,更論盡身邊女人,當中包括鄧麗君、林鳳嬌、吳綺莉。18歲的吳綺莉被成龍展開猛烈追求,拒絕過,但最後仍是敵不過「大哥」的豪氣和癡心,可惜一切美夢一下子變成噩夢,就在她懷有「小龍女」五個月後,成龍突然變臉中斷一切關係。有沒有後悔生卓林?吳綺莉堅定不移說:「我個人有一樣好處,每個經歷同過程都係學習,唔會後悔同埋怨,因為對件事冇幫助。」當時有沒有人勸告要落了小孩?她說:「我匿到自己好埋,大部份自己諗。」

吳綺莉承認自己是戀愛大過天的人,凡投入一段感情,便無悔地愛。「唔怪我個女,細個我都係拍拖大過天。陳翹英係亞洲電視戲劇組製作總監,多謝佢相隔30年都搵我拍《理想國》,佢一定覺得我細個時候好曳,《勝者為王》第一輯,我就係因為拍拖大過天,成日都話要減戲份,問可唔可以唔拍,細個基本上所有時間都係用嚟拍拖。」曾經有人質疑吳綺莉生卓林是為了箍住個男人,又傳要勒索天價養女,謠言滿天。究竟當初吳綺莉是追求愛情,還是為錢?她避談說:「我份人從來唔理人點睇,亦唔想解釋,我只係一個演員,埋位有好角色好劇本好開心,私人時間係我自己,做人問心無愧就OK,唔需要解釋同交代,我選擇咗自己嘅一條路,就要自己諗點樣行。」

難展新戀情「或搵個離婚嘅」

擁有22億身家的成龍,曾公開表明一毛錢也不會分給她們,那吳綺莉媽媽有沒有向成龍索錢?她說:「呢點我唔清楚。我真係唔明,現在好多單親媽媽,生佢都要諗點樣令佢成長,我唯一缺失係我太嚴太惡,other than that,我覺得我ok,有啲位我proud of自己,單親又有乜問題。」吳綺莉一直保持單身,對於有指她搶走梅艷芳兩個男人趙文卓和林國斌,她笑言都是「流料」得啖笑:「趙文卓都話拍過《黃飛鴻》,見過識得,林國斌真係見都未見過。嬲?冇。」

要展開一段新感情,對她來說不容易,因為要顧慮的事情實在太多。「我又唔係只拍過一次拖,過咗去唔講,我之後都有人追,但都忙,有咗個女,到你下次拍拖就有不同要求,可能我諗多咗,人哋要求我要小朋友,我要唔要呢?對我小朋友唔fair,嫁鬼佬會好啲,但中國人思想,真係錫自己嗰個多啲,對自己小朋友唔公平,又或搵個離過婚大家都有細路⋯⋯自己(諗法)好複雜。」她不介意單身,眼見好多差不多年齡的高質素朋友,即使沒結婚生小朋友,仍能活得開心。戲劇性的人生,會否考慮出自傳?她笑說:「自轉就會,冇特別諗!反而想再開畫展,講咗兩、三年,但畫畫都要講mood。」

娛聞樂陪你走遍全球追星,即Like「娛果」FB 專頁!
BannerBanner