吳味人生‧工作丨吳綺莉否認繼承大筆遺產 疫情狂食增磅怕影響工作機會

更新時間 (HKT): 2021.03.20 00:31
吳綺莉的人生歷盡波折,但她口中仍常念着「感恩」。

17歲那年,吳綺莉終於展開屬於自己的人生,某年暑假後返港,她形容自己「懵吓懵吓」便參加了亞洲小姐。吳綺莉是氣質型美女,身材高䠷,一路過關斬將,終以熱門姿態成功奪冠。但當年有傳吳綺莉是因為吳媽媽靠攏亞視高層的關係,才會勝出。花邊新聞,不輸對台的同屆港姐冠軍袁詠儀。Elaine斷言否認:「唔係,我都懵吓懵吓,嗰時我同契媽返香港都唔夠一星期,Nelson係我契媽個契仔,嚟我屋企講開暑期工,話不如幫劉娟娟手,有機會去法國,我以為係做服裝指導嘅助手。陰差陽錯就去咗選美,當時真係貪玩,諗住有得去巴黎,以一個讀書學生嚟講,放暑假有幾千蚊落袋,又有得去玩真係幾好。其實我好男仔頭,細個都鍾意短頭髮,工作以外,從來都唔修甲,真係戇居居俾人捉咗去(參選),當年我啲衫都係劉娟娟借畀我。」

不是做明星材料

在演藝圈工作31年,吳綺莉個性依舊,不愛化妝扮靚、衣着樸實隨心,雖然自覺不是做明星的好材料,但卻很喜歡演戲,希望做好每一個角色。2015年,吳綺莉的媽媽離世,Elaine繼承了一筆遺產,當年以約1,500萬full pay購入大坑的千呎寓所,但遺產數目並非外界想像多,因此她仍然不斷努力尋求工作機會,她說:「遺乜鬼產,我多年來都keep住工作,電視主持、freelance做電台主持,仲有做過網上節目。未來工作?我唔會set畀自己,因為演員好被動,咩電視台叫我都會做。」

吳綺莉先後為ViuTV拍過《理想國》和《太平紋身店》,早前為《太》劇一日連續做了8間傳媒機構訪問,非常落力。拍攝時間正正是去年1月初疫情大爆發,拍足9個月,每日開工大家都好擔心不停消毒,幸好最後仍能順利完成。而最近她亦好似發福不少,她笑說:「我由拍攝初期條裙原本係鬆身,後期已擔心拉唔到拉鏈。因為疫情期間,夜晚冇乜嘢做,我就坐喺度食餅乾,試過食晒成筒朱古力餅,一星期食幾個cheese cake,哈哈!我都唔接受現實,因為平時好少照鏡,唔知自己咩樣,一開始只係唔着牛仔褲,着橡筋褲頭就當冇事。」會否積極減肥?她還說:「冬天好難減,唔食嘢唔得……望落唔覺吖?!」

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner