ERROR孭飛揀口罩小姐難掩「狼性」 Dee哥出1000蚊同193搶人

更新時間 (HKT): 2021.03.22 23:34
(ViuTV電視截圖)

ViuTV主辦的另類選美節目《最後一屆口罩小姐選舉》今晚首播,首集介紹大會派出擔任主持的ERROR如何在街頭「獵艷」,隨街搵他們覺得合適的人選參加。

ERROR四子兵分兩路,分成兩隊在旺區街頭搵目標人物,梁業(肥仔)同郭嘉駿(193)在中環街頭搵人,雖然肥仔口講:「我唔係一個睇外表嘅人……」但身體卻很誠實,搵啱目標人物之後,他與193要求睇對方的社交平台的相片,睇清楚對方的真樣,更會即場要求關注對方的IG,甚至互相關注,擺明乘機識女仔!肥仔後來補充指希望搵到身材好及對眼靚的佳麗;193則他要求對方美貌與智慧並重。

節目組戴實頭盔

另一隊人是何啟華(Dee哥)及早前宣佈暫別娛樂圈的吳保錡,染了一頭橙髮的保錡表示:「我哋ViuTV而家就係欠缺做綜藝節目嘅人才,今次一定要選一個做綜藝節目好、講嘢好、夠放得開嘅女仔。」未知是節目效果,抑或是怕班haters又會攻擊,特別在保錡的訪問後出黑底白字的字幕:「主持言論只代表本人立場,節目組決不上身。」來「戴頭盔」。至於其他人對口罩小姐的選擇喜好,Dee哥稱着重候選佳麗本身有無幽默感、以及內涵和才華。

193硬搶Dee哥心水

今集主要是大會邀請40位入圍者進行真‧海選,各人除了自我介紹外,還有才藝表演環節,ERROR每人可以揀5位心水佳麗,落選者要即場除罩見真面目。而在揀佳麗期間,ERROR四子「狼性」盡現,當他們看到沒被選中的佳麗原來是名靚女時,忍不住即場慘叫,甚至追出去後台再睇對方廬山真面目。

另一方面,Dee哥一早睇中86號參賽者,可惜到揀人入隊時被193硬搶,Dee哥招攬不成已經十分灰,他在休息時間忍不住大叫,又踢凳洩憤。後來他衝入後台攞出銀包,自掏1,000蚊「收買」193,叫對方讓人,但193偏不讓,還諗到一串計劃如何整蠱Dee哥。

尹蓁晞被退選真相曝光

另外,早前聲稱已退選的尹蓁晞(Yumi),原來她是被淘汰出局,她一入場便被保錡認出,表示:「我有睇過你寫真吖!」Yumi尷尬答:「哦……係咩?」當193與肥仔問她關於ViuTV的相關知識時,Yumi被問到口啞啞;再被問到「除了姜濤和ERROR,最代表到ViuTV的藝人是誰?」時,Yumi答不出來,193直指她無捧ViuTV場,但Yumi還抵賴,指ERROR將能講的都講晒,193更義正詞嚴地批評她「唔專業」,最後Yumi一臉無奈地除罩被foul走。

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner