專訪丨鍾培生親列嫁入豪門10大條件 檢討感情遇阻滯:梗係我有問題

更新時間 (HKT): 2021.03.23 00:00

鍾培生(Derek)武鬥林作,但記者會全程黑口黑面,被網民批評是低EQ「三世祖」。鍾培生日前在淺水灣萬呎豪宅接受《蘋果》專訪,表示不介意民意逆轉,因為從小已遇上好多haters,「我出世就俾人hate到而家啦,有班人會同你講:『你冇屋企收X啦,又爛面,又矮。』但其實你畀咗啲咩我,我做乜要please你?我有一班真係好care同關心我嘅fans,日日inbox爆晒狂支持我,我會花時間覆呢班人,唔支持我嘅I don’t fxxking care。我覺得人性本善,但好多人被誤導,收到太多負能量訊息,佢哋唔識點表達先嚟hate你。我比佢哋強大,我更加要包容佢哋,希望將我拍嘅片,一個一個救番佢哋變成正能量嘅人。」

愛情好神聖

不論好與壞,Derek都是一個超級有自信的人,惟獨面對愛情,讓他有點手足無措。Derek曾被傳媒封做「純情小鴨鴨」,24歲才初戀,至今31歲共拍過5次拖,最長兩年,最快一個月就分手。問到現在有沒有拍拖?他尷尬笑說:「好單身呀!影到再解釋啦,哈哈哈。」

Derek兩年前上大台《女人四十》節目,被Speed dating(極速約會)對象田蕊妮睇死:「明點解搵唔到女朋友」Derek帶點不忿說:「嗰次我係幫個朋友,叫我上節目玩吓,藝人揀我哋,但個態度係惡劣嘅,佢一開始人身攻擊,嗰啲嘢俾人cut晒,始終係人哋節目,應承咗就做。我又唔係好care人講乜,咩叫追唔到女仔啫,今日我要大把人過嚟啦,但又可能好多人未必要我喎,咩叫有咩叫冇啫,最重要係尊重番女性,唔可以量化,愛情係好神聖嘅。」節目上,他自爆性慾強:「我男性荷爾蒙係過多,今朝7點剃完鬚,而家已經有鬚根,生得勁快,我男性荷爾蒙多過好多男人。」但笑言性慾強不會影響好多人,「唔會關好多人事,好寶貴。」

談到一夜情,他自認沒有膽量:「我肉體唔介意,但精神上係介意,實際上都介意。你睇我記者會,我係一個好高傲氣嘅人,但我都會驚,one night stand完會唔會俾人周圍唱,話你食過鍾培生,或者話我周圍食女。唔關家族名聲事,但都要尊重我未來老婆,人哋大家閨秀,我走去識啲本身唔潔身自愛嘅女仔,one night stand完點見人。」

感情遇阻滯:梗係我有問題

含住金鎖匙出世的Derek,祖父是「工廈大王」、華廈置業的創辦人鍾江海,撇開祖蔭,Derek靠自己一雙手創立電競公司,賬面身家已有3億元,絕對是城中筍盤。但何解至今仍未有女朋友?女仔好難追?平時口若懸河的Derek,想了又想說:「好問題,應該男仔做主動,但通常一拍即合,如果對方一開始睇唔到我嘅優點,我做乜要作賤自己?但如果一開始睇到咪可以一齊囉,男同女都唔需要為對方而改變。」他自覺最大賣點不是有錢,而是勤力,「大把人有錢過我,我覺得勤力唔多人有。」

最大缺點,似乎是好難相處,他笑着說:「正正常常,有手有腳、有事業,點解到而家喺感情上都咁多問題?咁梗係我有問題啦,唔通全世界啲女有事咩,咁梗係我有病啦,我梗係知啦!我成日都檢討。」檢討完,個性依舊沒改變,「冇喎,唔諗住變,繼續咁多自己規則。」原來要嫁入豪門殊不簡單,Derek還列出10大條件,首要似乎是要好生養:「想生4至6個小朋友!我對伴侶要求好高,基本樣靚、身材正、年齡介乎25歲至35歲、唔好遲到、勤力,要返工,仲要自我增值,又要啱又要夾,我又唔鍾意人瞓10個鐘,瞓咁多覺做乜?」

夢想包紅館畀嘉倩BB報天氣

Derek自細對數字已經好敏感,10幾個月大、牙牙學語已跟阿媽攞簿仔數1至300,連對愛情亦以機會率計算:「我覺得使錢喺人身上係opportunity(機會),用喺自己身上係liability(責任)。有次去台灣,個女仔話唔記得帶化妝品,頂你個肺,原來LA MER咁貴,諗住豪爽,望吓張單5位數,真係躁底;我第二日見到個Gundam好靚,望咗10分鐘,女方問咁平你做乜唔買?我就係唔會買啲我唔需要嘅嘢,最後我哋都係普通朋友。」去年Derek邀請女神上自家製網上節目,是否方便識靚女?他說:「疫情下,想幫台前幕後都有份工,發掘吓香港好多地方原來咁靚。」Derek為冧前新聞主播陳嘉倩,豪言包紅館讓她報天氣,他說:「夢想同目標係唔同嘅,我冇承諾,係夢想幫佢開演唱會啫。」

撰文:嵐山

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner