鍾培生與二世祖保持距離 靠自己電競公司賬面值3億

更新時間 (HKT): 2021.03.23 00:00

鍾培生(Derek)是「工廈大王」鍾江海的孫子,有個外號叫「百億富三代」,但實情是「富四代」,由太爺鍾銘選開始已經營房地產生意。不過,Derek沒有繼承家業,反而自己創業搞電競,短短8年做得有聲有色,賬面身家接近3億元。「去到我呢代,爸爸仲喺公司,好多人(其他家族成員)都喺公司,我就覺得如果個天畀呢個option我,可以利用媒體或自己嘅能力,有屬於自己(成就),說話都比較大聲啲。」不過,他至今仍未置業,認為買債券更具靈活性。

鍾培生最怕二世祖

自幼父母管教嚴厲,他曾透露12歲前每天只能打機15分鐘,一旦扭計便會被體罰,「要打要跪,鐵雞毛掃都被打彎。」難怪Derek的生活好有規律,尤其要應對「林鍾一戰」,每朝7點半起身操體能,完全不像一般的二世祖。他說:「上天畀你嘅嘢,睇你點用啦。一班個天畀咁多資源你嘅人,每日只顧吃喝玩樂,嗰班人物以類聚,唔會同我黐埋一齊,道不同不相為謀。」

擂台下的Derek沒有半點殺氣,還有貼地一面。被問住萬呎豪宅,能否想像住劏房的苦況?他二話不說地說:「香港地少人多,希望快啲解決到土地問題。我未體驗過喺香港住劏房,但東南亞創業時,由於攞投資人嘅錢,我都住得勁平,喺越南住百幾蚊晚嘅房,我出差住3、4日(就ok),但長期住真係好辛苦,希望可以快啲改善。」他自言是積善之家,有時都會低調落區做義工,但從小媽媽亦教曉他另一件事,「我哋唔好蝦人,但都唔可以俾人蝦;你唔犯我,我唔犯你,除非你搞我,我就十倍奉還!好似林作抽我水,我就會將呢樣嘢變成自己嘅騷。」

財雄勢大明恰林作

Derek和林作同月同日生,一句「抄你100萬」,將兩個互不相干的人拉在一起。有人陰謀論認為,「林鍾一戰」是二人夾檔搵錢兼提高知名度,他不屑地說:「之前我架車俾人炒,有人話我專登plan嚟放上YouTube,係咪黐線㗎,呃保險刑事㗎!我玩都唔同林作玩啦,佢邊個呀?!」Derek自恃財雄勢大,明恰林作:「你都儍嘅,錢又我出,場又我搞,佢都恰得人多。我見過佢下線鬧林作,佢會inbox對方話:『我有錢、有權,你乜q都冇,你收X啦!』佢會咁鬧haters,我今日就做番一次畀佢睇,係幾咁乞人憎,替天行道。」

Derek自認EQ「ok」,當日來來去去得幾句,他解釋:「我重點係『唔好講廢話,擂台見,你係一坺屎。』你問多我300次都係呢句喇喎,其實我今日態度同嗰日差唔多,只係嗰日有啲擂台嘅殺氣喺度。佢嬉皮笑臉,我唔會降低level同佢玩,但我應承佢簽咗約,將來辯論又好唱歌又好,咪正正經經嚟一場辯論,食硬佢,佢讀咁多書講嘢都漏口㗎喎,條友仔。有啲人都覺我係真男人,有嗰句講嗰句,唔需要語言偽術,尤其而家香港動盪嘅時候,明明唔好,你都硬要話好。」

撰文:嵐山

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner