專訪丨臨時演員伍仔日賺180元捱足十年 變身人氣YouTuber創百萬點擊

更新時間 (HKT): 2021.03.25 00:30

追夢要有時間表,靠「齋talk」冒起的YouTuber伍仔,有1/8南印度人血統,18歲做臨時演員,其後加入TVB,經過10年搵朝唔得晚的生活,終於決定放棄理想。10年又10年,38歲伍仔重回將軍澳舊地,望住TVBuddy緬懷過去:「嗰時好恨入TVB,𢯎人簽我,但佢哋會同你講:『電視台唔賺錢啦,唔好諗住喺度搵錢,你當嚟玩,我哋好歡迎你嚟玩。』後來我真係搵到穩定收入,就冇再喺度有太多幻想,我建議𡃁仔追夢,當入少林寺,但30歲打後就要諗出路。」

伍仔覺得初時做臨記幾好玩,「頭3年我一句對白都冇,180蚊拍10粒鐘,人哋畀錢睇明星,我就收錢睇明星,幾好!」要維持生計,伍仔兼做健身教練、冷氣機房管理員等,但當時女朋友想他有一份穩定工作,伍仔在機房祈禱後出現奇蹟,「女友幫我填form申請去TVB做劇務,人哋睇完我份履歷覺得我應該做幕前,畀我簽咗張特約演員合約。」伍仔第一套劇是陳小春主演的《鐵咀銀牙》,飾演陳夢吉的家丁阿一,「清裝要剃頭,冇人肯剃,但嗰時我乜都肯做。當年有場戲同陳小春做對手,監製讚我做得好得意幾好笑,當時有信心可以演喜劇。」自以為彈起,但機會不由自己掌握,最後又是等,開,工。

初代YouTuber收入微薄

近年傳統影視娛樂走下坡,電視台小生姐仔、電影紅星都要走入網絡世界。伍仔可算是香港初代YouTuber,2011年首度編演網片《大食女友十八禁》上載五天達100萬點擊,「其實我睇唔到,係你哋老闆(黎智英)睇到,我第一次接觸網片就係壹傳媒。之後有位導演去網台,想搵主持但又唔知拍乜,我話『唔難喎,啲人鍾意乜咪寫乜囉』,寫咗《大食女友》劇本,一出就爆。」憑着超高模仿力的搞笑演出,伍仔開始自製更多短片放上網,原來頭幾年只能賺人氣,實際收入不多,「以前YouTube冇分紅制,我哋做咗好多年義工,喺出面仍要接job,幫人寫歌寫劇本,仲有返TVB做特約。嗰時喺網絡叫紅過一陣,但返到TVB都係俾人寸,導演會話『個網絡小王子』,當時internet係渣啲,會專登擺你個位勁後,但為生活乜都要做。演員係要人畀機會,做YouTuber就可以自己話事,我喺TVB拍嘅最後一部劇就係黃子華嘅《My盛Lady》。」

伍仔相當勤力,連YouTuber「後輩」蘇施黃都誇讚他。近年他轉型不再扮鬼扮馬,靠「齋talk」搵食,一日出5條片,每條片講足10分鐘。他直認讀書少,但喜歡看書,尤其是心理學和佛學,題材來自每日新聞,「我以前係自閉,可以3日唔講嘢,2015年同笑波子贏咗個比賽,我哋話想做男主角,大會就畀機會我哋跟詹Sir(詹瑞文)上一堂,好得意,佢淨係教我哋講嘢。後來我拍咗條片,研究外賣App係咪咁好搵賺4、5萬蚊一個月,講吓講吓發現啲人原來鍾意聽我講嘢。」

被嘲怨婦、垃圾 一笑置之

網絡充斥好多haters,伍仔亦積落不少仇家,經常跟其他YouTuber爆粗互片。對於被嘲是「怨婦」,伍仔戚戚嘴角笑說:「一聽呢兩個字,就知係邊個fans啦,曾經有人係咁形容某啲人,佢哋都係執人口水尾。其實我唔介意,佢喺間紫色房仔話人百呎房仔,我咪喺百呎房仔話佢間紫色房仔囉,其實大家宣傳吓,我識佢,佢識我,但大家冇見過。即使話我垃圾都唔嬲,我修佛、睇佛學,所有說話都係人嘅心念反射出嚟,一個叻人,唔會睇住一個廢嘅人,然後話佢廢。共勉之。」

伍仔有感同行口水戰無傷大雅,最實際是有錢落袋,江湖傳聞,YouTuber年薪高達100萬,伍仔避重就輕帶笑說:「幾年前搵得唔少,當年有公司簽我做全職藝人,仲有Coffee同笑波子,嗰時我受幾份糧,做藝人、開channel,仲幫馬會拍節目。百萬年薪?目標係……(以前搵多啲?)咁現在多啲。」

欣賞蕭若元:燈神都係神

伍仔曾以數據分析,蕭若元每月最少賺100萬元,原來蕭生亦是伍仔的偶像,「我好欣賞蕭生,燈都係神,一係最叻,一係反差。蕭生係燈得嚟好有智慧,但香港而家都避談政治,口水鬧交冇事,大家做嘢都係希望有糧出,嬉笑怒罵,唔使用粗口乜佢,咪讚佢天才囉。」

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner