MIRROR九展騷開售不足1小時全部售罄 主辦積極考慮加場

更新時間 (HKT): 2021.03.25 15:56

組合MIRROR日前宣佈將於5月6至8日在九展開成軍兩周年演唱會,演唱會暫定3場,門票於今日早上10時公開發售,不少fans今早已坐定定做好準備,全力撲飛。可是,在開賣不久,售票網站卻顯示系統長期繁忙,1小時內所有門票經已全部售罄,令大批fans失望而回。

柳應廷(Jer)和MIRROR的社交平台專頁今早在開賣前夕,分別出posts提醒大家記得準時10點去撳飛,Jer還說:「大家搶飛加油!」今次除了快達票可以買飛外,MOOV的網上商店亦有3套限定套裝,分別是A$1420、B$920與及C$720三種套餐,當中包括一張演唱會飛、獨家限量 ONE & ALL Tote bag 和演唱會紀念卡1張。不過在10時04分,已經有fans在網上留言表示去到畀錢的時候,收到通知表示已經售罄。而快達票方面的情況亦不見樂觀,不少fans表示入不到網站,購票系統顯示繁忙,即使成功進入,去到畀錢的時候亦告失敗!

系統長期顯示繁忙

結果在短短的1小時,限定套裝已經售罄,而購票網在開售兩個多小時,系統仍然顯示相當繁忙,有fans到MIRROR的FB 留言表示不滿說:「Load到入去點揀都話無飛……揀1張都買唔到,但又畀你揀……好嘢!!!」「我真心想知有冇人入到網站買到飛?我根本入都入唔到!」、「既然都賣晒,購票系統仍然非常繁忙係咩事?」「主辦單位有冇人回應一下呀?好過份囉!成個鐘都入唔到去,入到去已經賣Q晒!」其後又有fans留言,網上已經出現黃牛飛,7/5周五晚的VIP相連位,叫價高達$8,000,但亦有人在拍賣網以雙倍價錢徵求門票!

《蘋果》今早曾向MIRROR的經理人花姐了解,會否考慮加場,但暫時未有回覆。後來在MIRROR的官方社交平台,正式宣佈演唱會飛已經售罄:「知道仲有好多希望支持MIRROR嘅朋友未買到飛,我哋正積極考慮加場,請密切留意MIRROR FB專頁公布最新消息!」

花姐今日回覆《蘋果》時指加場仍「努力中」,大批歌迷渴望移師紅館舉行,花姐解釋:「因為個場係上年已經book咗,但因疫情延至5月。」

演唱會飛秒殺,Jer受《蘋果》訪問時都說希望有加場,但要等公司決定。講起黃牛癲價飛,Jer說知道一票難求,開售前有為fans打氣,同時呼籲勿買黃牛:「我哋唔鼓勵,千祈唔好幫襯黃牛!」

MIRROR在九展開騷,好多人都嫌場地細,令搶飛難度變「歷戰級」,希望MIRROR可以到紅館開騷,Jer說目標一定是去紅館,但現時不了,他說:「依家唔會啦,限咗50%入場,冇咗萬幾人喎!」言語間充滿野心!

RubberBand最後加場同樣搶光

RubberBand原本由4月3至5日在紅館舉行演唱會《RubberBand Ciao 2021》,亦因反應熱烈,早前再度宣佈加開6日最後1場,同樣於今日早上10時公開售票,由於疫情關係,演唱會入座率只得5成,同樣是「一票難求」,有人歡喜有人愁,在RB專頁內,有歌迷反映,網上購票至付款步驟時,同樣出現門票已經售罄的訊息。其實由第一次開賣門票前,RB歌迷已自發在討論區開Po,呼籲歌迷就算買不到門票也不要幫襯黃牛。而歌迷發揮互助精神,在討論區以原價出售少量門票,務求有騷齊齊睇,十分友愛。

--------------------------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner