Coffee遭殃「BNT好似勁啲」
孫慧雪接種瑕疵復必泰 手臂肌肉痛

更新時間 (HKT): 2021.03.25 02:00

武漢肺炎疫情反覆,港府呼籲市民打疫苗,惟昨早港府宣佈暫停接種BioNTech復必泰疫苗,原因是部份批次藥瓶封蓋包裝有瑕疵。而殃及的藝人有孫慧雪、林芊妤(Coffee)及張堅庭,已打了第一針的孫慧雪,昨日回覆本報表示手臂現肌肉痛,同樣出現肌肉痛的Coffee,回應網民不打科興打復必泰的原因是「BNT係利用新科技,好似勁啲」。

香港政府引入的三種疫苗分別是中國的科興、德國的BioNTech復必泰及英國阿斯利康藥廠(AstraZeneca),截至昨晚8時為止,出現了累計九人涉注射科興後死亡個案,而注射復必泰後則有一人死亡。昨日港府突然煞停BioNTech復必泰疫苗,指批號為「210102」的疫苗藥瓶封蓋包裝涉事有瑕疵,調查期間為謹慎起見,暫停接種這批號的疫苗。孫慧雪昨早在社交網貼拿着前天才接種完復必泰疫苗的相片,並留言說:「我啱啱先打完,𠵱家話暫停。#210102」

家有老少甘願冒險打疫苗

就剛巧接種了涉有問題的「210102」批次疫苗,孫慧雪以短訊回覆《蘋果》:「因為屋企有老人家同小朋友,所以決定去打疫苗,𠵱家都冇辦法,惟有等消息!謝謝!」問到打完第一針有甚麼感覺?孫慧雪表示:「只係手臂肌肉痛,暫時冇其他特別反應。」

孫慧雪和有米老公羅天彥於2016年結婚,兩人育有3歲半兒子Riley,早前孫慧雪透露本身血壓和膽固醇數值偏低,心臟跳動異常,經檢查後發現患有先天性血管收縮,網民知道她打疫苗後,留言關心:「你又話自己有心臟病嘅,打唔打得疫苗㗎?」孫慧雪回覆:「我睇咗醫生,佢話我OK。」但亦有網民惡作劇留言:「永遠懷念你!」孫慧雪回覆:「一啲都唔好笑呀!」有網民亦指「其實應該睇定啲先,點解要咁急呢?有乜嘢事屋企人點算?」阿雪就解釋因為緊張屋企人,惟有自己去打疫苗。

林芊妤同樣於前日接種涉出事的復必泰疫苗,育有兩歲兒子翟德彥(伯伯)的她電話回覆《蘋果》時說:「都冇乜嘢事,係今日嗰個位肌肉有啲痛,但冇乜特別,其實都唔係太擔心嘅,睇吓點囉!」有網民留言問她為甚麼不打科興?她回覆:「好似BioNTech 9x%防預呀嘛,多過科興,同埋BioNTech係利用新科技,好似勁啲。」

張堅庭連環出帖撐復必泰

導演張堅庭曾力撐復必泰及身體力行接種,他今個月10日在fb發帖,指已打復必泰,留言︰「我奉勸大家打疫苗,我係好相信疫苗技術,閱讀資料睇唔少,淨紀錄片都睇咗幾條,Discovery Channel條片最詳細。」更指姑娘問他知否打甚麼針時,他三度回應︰「BioNTech!復必泰!最後:袁國勇教授嗰隻。」月中他更出帖諷刺眾離地高官指︰「讓高官先行打疫苗,如果佢哋安全,即疫苗安全。如果佢哋死咗,咁香港就安全。」引來大批小粉紅攻擊,最後他說因「太太責備」而刪帖。張太楊諾思是英皇老闆楊受成女兒,英皇旗下藝人要返內地搵食,難免造成尷尬。到12日張堅庭又再出帖,自爆打針後身體狀況︰「第一天黃昏針口有啲痛。當晚睡眠質素自覺良好。第二天痛感消失90%,喉嚨有輕微乾,兩小時後已經回復正常。第三天,完全沒有不適反應。」昨日復必泰突然被暫停接種,他再上載英國打疫苗後新增個案、入院個案及死亡個案明顯下降的圖片,留言︰「唔好聽人講,相信科學。」《蘋果》致電張堅庭,惟截稿前仍未回覆。

娛聞樂陪你走遍全球追星,即Like「娛果」FB 專頁!
BannerBanner