梁祖堯為龍門冰室告急感心痛:何不更珍惜他們的付出?

更新時間 (HKT): 2021.03.26 15:40

龍門冰室負責人張俊傑日前在網上公開呼籲救亡,雖然晚市堂食重開,但政府先後兩次禁晚市堂食,令餐廳入不敷支,積壓太多債務,直言「我哋好可能捱唔住了」,希望獲香港人支持「可以捱過呢一關」。曾經在劇場界同樣受到疫情影響,經歷過徬徨同無助的梁祖堯,昨日在FB出post支持龍門冰室,甚至去到餐廳做樓面,希望他們可以捱過這一關。

梁祖堯在FB撰寫長文,他接獲一個曾經做過記者的朋友通知,龍門冰室告急,連執達吏都已經出現,令他回想自己第一條免費廣告系列片,正正就係龍門冰室,所以聽到這消息後,覺得很心痛,朋友問他可否到餐廳吃飯兼影相,湊巧梁祖堯昨日要開工拍《空肚講宵夜》,所以他決定收工後到尖沙嘴店。

因為拍節目期間不停進食,所以去到餐廳的一刻,實在「飽到食唔落」,於是梁祖堯提議幫手做店員,「佢叫我收錢,以我數學嘅能力我真係唔想令到間舖頭雪上加霜,所以就做咗一晚樓面」。見到許多人到來撐場,7點至10點真的忙到不可開交,「其實真係好忙好忙,幫手帶位執枱落單,真係連出個post叫大家落嚟都冇時間」。

困難時間幫得就幫

梁祖堯稱知道以前關於龍門冰室的有好多風波,但係無論如何他會選擇相信龍門冰室及張先生,信他們與香港人同行,同時呼籲大家繼續支持,讓龍門冰室渡過難關「加油呀」。最初有不少網民留言,質問梁祖堯為何要去撐龍門冰室,有人繼續鬧爆餐廳食物質素和員工態度惡劣,亦有人覺得大把黃店告急,何解要去撐這間是非多多的餐廳,梁祖堯卻留言解釋:「其實,有爭議係不爭的事實,人誰無過?功德多定過錯多,我信時間會有定案了。喺困難嘅時間,我都想幫得就幫。如果係唔支持,唔去無可厚非的。如果你支持,就去幫幫佢過呢一關。不喜勿插,雪中不送炭,又何必加霜而誅之呢?每日唔開心失望嘅事已經太多了,香港人,心都好攰了。你係,我都係。」

放過自己放過人

後來負責人張俊傑亦留言感謝,梁祖堯亦表示:「唔好客氣啦。惹來爭議,係預計之內的事。就算講多難聽的説話,他們都不會是敵人。我自己做人宗旨,與其執念其過錯,何不更珍惜他們的付出?我衷心感激你所有的付出。加油!」有網民留言支持梁祖堯,問他幾時再去餐廳幫手,有人說「我希望香港嘅名人可以向阿祖學習,鬥夠啦!各位,我知大家都好有性格,不過真係鬥夠」、「本來仍有點猶豫,不過見到你就唔使再諗啦,啱!每日嘅唔開心已經太多,多到好over,大家或者都雪中送炭,放過自己放過人,係艱難中一齊添啲暖」、「唔支持就唔好去幫襯,何必再批鬥呢?人民鬥人民,你話邊個最開心」。

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner