Steven扮鵪鶉整月終上水認衰仔 「我嘅原因令老婆情緒唔好」

更新時間 (HKT): 2021.03.26 22:39

張致恒(Steven)上月被貼街招高債,繼而揭發Steven原來向好多圈中人借錢,關智斌(Kenny),林盛斌(阿Bob)、張彥博和馮鎵瀠(Naomi)等都是債主,其中Naomi曾在網上呻過有人借錢2萬不還,與Steven老婆雯雯隔空激辯,雯雯更一度點夠向Naomi求饒,稱會慢慢還清餘下欠債,Naomi卻揶揄狼來了。

由事件曝光起,Steven一直潛水未蒲頭,被指龜縮,他終於在一個月後的今日,在IG上水,發文稱:「我冇走數我冇着草,我而家只係默默地工作。」Steven稱「一直都好想還晒啲錢俾我所欠嘅朋友」,曾經還錢給朋友,但仍未全數清還,形容自身境地:「近一段時間過得好辛苦。」Steven為拖數未還錢向朋友道歉,說會努力工作盡快還錢。

一直被指鵪鶉,Steven今次終於為老婆出頭並認衰:「仲有嘅就係因為我嘅原因令到老婆嘅情緒唔好。」他說樂意接受所有人的指罵,但懇求不要騷擾老婆雯雯,代老婆表示照顧兩個兒子有好大壓力。

據《壹週刊》報道,Steven老婆雯雯外公盧沃勤擅長紋身,曾為陳惠敏紋上胸前雙鷹及背後的蟠龍圖案等。Steven說作為公眾人物,食得鹹魚就要抵得渴,會接受大眾將目光放在自己身上,不希望影響到家人。

Steven又以鍾舒漫的《如果看見明天》寄意,「如明天不記住昨天 以往的以後誰在意 如曾有錯未成大錯 要改都總算是容易 我最親愛的 這一生寶貴是時間 你要歸來 總不太晚」,似乎想要時間改過。

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner