馮盈盈貼姜濤合照撲火 自稱fans遭踢爆IG冇follow偶像

更新時間 (HKT): 2021.03.27 18:38

新增內容

TVB日前舉行綜藝節目記者會,想不到全個記者會的「高潮」,竟然是靠惡搞對台的藝人來製造話題,結果引爆連串「關公災難」,當日在台上有份扮姜濤的鄧智堅,以及有份推波助瀾的司儀包括麥美恩、馮盈盈和林盛斌(Bob),其社交平台均遭到大批網民踴入洗版式怒轟,網民指他們以低劣手法打擊對手,行為小學雞之餘,亦有失大台身份。

當日在台上大叫「你夠膽嚟踩場……打到你變薑蓉」的馮盈盈,今日在IG中,忽然貼出一張在2018年尾和姜濤的合照,又貼出一條和麥明詩、昔日好姊妹江嘉敏齊齊睇MIRROR台上表演,留言說:「呢個moment我要爆喇,其實我嘅真正身份係,追星族,我一邊努力撲緊MIRROR演唱會飛,一邊努力捍衛姜B喺我心目中嘅形象,嗰啲什麼姜蓉!?就算再扮得幾盞鬼,就算再向我姜B致敬,就算香港人再多幽默感,都接受唔到囉,今晚我實打多兩碗姜蓉撈飯食,咁先吞得落呢啖氣,無咩事嘅話我出返去撲飛,有無人有多3張Mirror演唱會飛俾我?我助手同佢朋友都想睇」再hashtag「3張Thx」、「2018年12月13日第一次合照」、「2019年4月19日再為你歡呼」。

馮盈盈忽然「姜糖」上身,自稱喜歡對台的藝人,不過網民繼續唔buy,留言:「你係覺得自己隊PR team好幽默?」、「攞姜濤嚟呃like真係第一次見。」之後更有網民發現馮盈盈IG根本冇follow姜濤,斥她純粹為拆彈而post合照。至於麥美恩,雖然被網民鬧爆,指她冇禮貌又嘩眾取寵,不過麥則暫時未就事件回應。

-----------------------------

蘋果初心不變!26周年「撐蘋果Tee」預售:

你的優惠訂購海外訂購按此

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner