曾志偉睇「薑蓉」被追打拍晒手 阿Bob誠心道歉

更新時間 (HKT): 2021.03.27 17:32

無綫日前舉行綜藝節目記者會,為搞氣氛,竟然惡搞對台的人氣王姜濤,結果引爆連串「關公災難」。當日台上的鄧智堅扮「薑蓉」,即被司儀之一的麥美恩撲出來追打,大嗌:「收聲啦!」馮盈盈則尖叫說:「你夠膽嚟踩場?打到你變薑蓉!」Bob亦附和大叫:「𡁻佢!打佢!」現場一片歡呼聲,連剛上任的無綫副總經理曾志偉在台下睇到拍爛手掌,明顯好滿意一班藝人的表現,但就遭網民指他們以低劣手法打擊對手,行為小學雞之餘,亦有失大台身份。

離開TVB多年的王喜傍晚亦加入戰團,在Facebook留言暗嘲曾志偉和王祖藍:「醜化姜濤做薑蓉仲要喊打嘅宣傳,引證品德、人格係同身高成正比!原來請你兩個返嚟攪賤個台Super!」

Bob道歉:對唔住

阿Bob林盛斌當日沒有撲出去追打,但今日為「𡁻佢!打佢!」的失言道歉,他在IG寫道:「收到各位嘅意見,亦明白大家嘅感受。如果我嘅行為同言論令到任何人唔開心,我衷心同各位講聲唔好意思,對唔住。亦向姜濤同其他支持佢嘅朋友及粉絲表示,我為我一時衝口而出嘅不當說話令人有唔好嘅感受,感到十分抱歉,我亦會好好檢討我日後嘅言行。」Bob亦有回覆傳媒,被問到是照稿讀還是爆肚?有沒有直接向姜濤或花姐道歉?Bob說:「因為我唔想我一時衝口而出嘅失言,令到有任何人有唔開心嘅感受,所以我覺得我應該要向佢哋承認錯誤,誠心道歉,我亦會好好檢討自己。我聯絡咗一位ViuTV嘅朋友,麻煩佢將我嘅訊息轉達畀姜濤知道,希望佢可以原諒我嘅錯失。」雖然仍有網民留言繼續鬧:「低俗,令人失望」,但亦有人覺得願意承認自己過錯已經好好,「放心,我照舊支持,畀心機」、「欣賞你咁誠心道歉,下次唔好啦,加油!」

「薑蓉」鄧智堅自我檢討

同樣受網民圍攻的「薑蓉」鄧智堅亦在IG帖文,表示有檢討需要,留言:「收到大家的意見和感受。作為一個中坑,正因為身形、外貌、歌聲都與姜濤先生有很大分別,所以模仿了一個完全反差的造型,並無冒犯任何人之意圖。作為創作和表達上,我們需要再作檢討才能有所進步。戲仿於世界各地源遠流長,通常都是取材於當代知名人士作對象。本想自嘲本人是『假歌手』及諷刺自己青春不再。不論我當初的出發點是怎樣,作為一個大叔要對自己的言行負責任,戲仿出來的效果,若然為任何人,帶來不適或不快,本人會作出檢討。自己跟Mirror部份成員亦是朋友,大家一起在不同領域為香港演藝事業和觀眾努力,亦會互相勉勵。預祝姜濤及Mirror成員演唱會成功,事業更上一層樓,並祝願大家身體健康。」

-----------------------------

蘋果初心不變!26周年「撐蘋果Tee」預售:

你的優惠訂購海外訂購按此

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner