陳志雲談姜濤被惡搞反助人氣升 爆TVB搵陳奕迅做嘉賓搶ViuTV頭啖湯勸換人

更新時間 (HKT): 2021.03.28 17:32

無綫前總經理陳志雲,今日在其個人YouTube頻道節目《午間短評》,談及近日TVB惡搞姜濤一事,志雲指惡搞事件雖然觸及不少「姜粉」的神經,但反而有助姜濤以及其組合MIRROR的人氣。志雲欣賞姜濤對事件高質素的回應,更踢爆TVB搶ViuTV頭啖湯請陳奕迅做節目嘉賓,但志雲建議ViuTV另覓人選好過。

陳志雲在節目中談到笑話和趣劇,如何設計和演繹才不至於粗鄙、低俗及令人反感,只是一線之差。志雲直言TVB日前舉行的綜藝節目記者會上,找來藝人鄧智堅扮演姜濤來踩場,然後被3位司儀麥美恩、馮盈盈和林盛斌(Bob)揶揄一番,手法十分低俗。志雲笑指︰「肉麻當有趣嚟形容TVB先前舉行嘅綜藝記者會,最貼切不過。藝人鄧智堅戴一頭金髮自稱『薑蓉』,好明顯影射緊姜濤,首先用『薑蓉』呢個名真係out得好緊要。」他指當年這名字是用來戲稱港台Phone-in時事節目《千禧年代》的主持周融。陳志雲指鄧智堅模仿姜濤唱歌、講急口令及畀心手勢,再被司儀形容是「假歌手」,甚至被鬧、被追打及被推撞,看見這種低級趣味,完全不好笑,認為特首林鄭月娥應該行出來譴責他們。

事實上近年偶像歌手買少見少,而TVB早前才宣佈開放平台,支持樂壇發展,難得ViuTV培育一班新人出來,當中特別是姜濤成為萬人迷,為何TVB要摧毁別人?完全是講一套做一套。志雲說︰「冇可能連一個姜濤都容不下?我終於開始明白,點解叫TVB做方丈,何況呢種挖苦製造笑點嘅形式,已經過咗時。」

陳志雲叫一班姜濤fans們不要太勞氣,認為公道自在人心。他好欣賞姜濤今次高質素回應被惡搞一事,指姜濤態度好又大方得體,還代fans們道歉,志雲大讚這位年輕人,前途無可限量。不過志雲亦有為扮姜濤的鄧智堅說句公道話,他說︰「大家唔應該遷怒於佢,佢都係一位演員,只係照公司嘅吩咐去演出。」事後Bob、馮盈盈和麥美恩分別跪低,在社交網出post道歉。據陳志雲分析,今次惡搞事件,不但沒有影響姜濤,反而有助他及其組合MIRROR的人氣更旺。

最後陳志雲更爆料指,ViuTV下月18日舉行的首屆音樂頒獎禮,本請來陳奕迅擔任嘉賓,但TVB下月11日推出的首集綜藝節目,搶了ViuTV頭啖湯,率先找來陳奕迅做嘉賓。而陳志雲建議ViuTV找過另一位嘉賓,事關近日陳奕迅撐新疆棉花而跟合作多年的品牌割席,志雲認為︰「一來無謂重複TVB所做嘅嘢,二來喺呢啲國際大事,風高浪嘅時候,冇必要為咗一個演出,拖入一啲國際政治漩渦當中,呢個風險由得TVB嚟承受,佢哋承受得起嘅。」

-----------------------------

蘋果初心不變!26周年「撐蘋果Tee」預售:

你的優惠訂購海外訂購按此

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner