吳耀漢指父親撈偏 有吸食鴉片習慣:嗰時好普遍

更新時間 (HKT): 2021.03.28 14:58

吳耀漢大女與二女因懷疑涉及毒品案件,日前先後被海關拘捕,2人的爺爺本身也有吸毒的習慣。案發前吳耀漢曾接受車淑梅港台節目《舊日的足跡》訪問,港台今日如常在節目中播出訪問,吳耀漢大方表示父親吳海霖(九巴及九龍殯儀館創辦人之一)當年撈偏門起家,有吸食鴉片的習慣,那個年代是普遍的事,眾所周知。

為觀眾帶來歡樂,吳耀漢自言個性樂天,他說:「你點去睇事件、點樣面對事件,態度要正面,正能量態度,乜嘢事都簡單好多。」富二代的他被車淑梅問到是否自小生活無憂而成就喜感天份?他說:「奇怪就係呢一點,好多人都有咁諗法,我爸爸撈偏門,屋企有16個兄弟,4個媽咪,我媽咪排第2,喺我8歲時拜拜咗,你諗吓屋企有3個媽咪,仲有佢哋仔女,嗰啲鬥爭做到出面。」在家中排行第8,吳耀漢坦言媽媽離世後,過着無王管生活,之後被安排到聖士提反書院寄宿,他說:「學校有個碼頭,我哋喺度釣魚,係好快樂嘅事。嗰時童年快樂唔係喺屋企,反而係寄宿學校。」

爸爸有吸毒習慣

吳耀漢爸爸當年在社會上有頭有面,位於山林道大宅經常有明星拜訪,他說:「有張瑛、梁醒波、新馬仔之類嚟,李小龍都行埋一邊,而家成龍同佢哋比較都係行埋一邊。」問到當年跟李小龍是否認識?他說:「嗰時小龍老竇同我老竇熟啲,因為佢哋大家一齊『追龍』(吸食鴉片),佢哋都有呢個興趣,嗰時好普遍,好多做戲都有呢舖癮。」他更指當年寄宿所住的房間便是爸爸的煙房之一。

談及爸爸,吳耀漢至今也不明白為何爸爸吸食鴉片仍可以兼顧繁重生意,他笑說:「初初入行時,陳惠敏就話跟我老竇搵食,同董驃拍戲時,佢又話幫我老竇啲馬晨操,之後聽講番話我老竇拎住個藤喼入去馬場做外圍。」吳耀漢笑指自己好蠢,童年時沒有察覺家境富庶,直至15歲時到英國寄宿學校讀書,突然想到4兄弟同讀英國最貴寄宿學校,才聯想到自己生於大富之家,他指當年爸爸指香港最缺乏醫生,跟他們4兄弟表示最好到英國讀醫科,結果有2位哥哥完成醫科,而他讀了1年牙醫後便覺得就算畢業,也不享受成為牙醫「嗰時我好鍾意睇戲,見到演出就覺得係好玩世界,越去分析就越吸引。」

父親反對結婚脫離關係

轉為修讀戲劇,畢業後,吳耀漢因為愛情大過天而沒有即時返港,他指19歲時結識了當時女友,踏入21歲便結婚,他說:「當時係合法年齡結婚,我要結婚,老竇你唔鍾意都吹我唔脹。點知我老竇話唔理你合唔合法,我就同你脫離關係。佢有原因係話我書未讀完,你養起老婆,養得起頭家咩?」但吳耀漢堅持打工養家,結果令爸爸好失望,因為當時爸爸心想即使讀不成書,也可以回港打理家族生意,建造王國,他說:「老竇諗住我讀唔成醫,都可以返嚟幫佢打理賭業,不過我梗係唔會。」

面對爸爸以脫離關係威脅他不能結婚,吳耀漢指當年愛情偉大,無理由因爸爸一句話而縮沙悔婚,他說:「呢方面令我學到,到我做老竇時,千祈唔會威脅啲仔女,因為你迫佢要決定,你未必會着數。跟住我做咗自己第一份工,喺一間叫『長城』中國餐館做洗碗碟,後來做水吧。呢件事之後無耐佢就拜拜埋。」問到有沒有返港送別爸爸?他說:「無,邊個買張機票呀,其餘3個媽咪都冇1個話買咗機票你返嚟啦,我又冇開口問,我一世無求過人。」再被問到跟父親脫離關係,失去任何遺產承繼權是否也沒所謂?他說:「唔係,你冇畀詳細資料我,係代表幾多錢呀?係你畀我嗰份代表幾多錢?唔知喎﹗你點會覺得係損失,你都唔知捐失乜。」

談到第一段婚姻為何只維持半年,他指夫妻成長同時,又發覺原來婚姻生活是需要不斷遷就對方,最終決定離婚。25歲時結第2次婚,他說:「當時識咗第2個(現任妻子Susan)又好快想結婚,但又唔得,因為要等3年(英國辦理離婚手續需時3年)。」1970年跟Susan一齊返港,他形容當時是前路茫茫,因為在英國已花了15年投身演藝事業,漸漸發覺無機會,他說:「我同我老婆講唔記得咗香港係點樣,當時生咗兩個女,仔未出世。我好想返香港,睇吓有冇機會。」於是帶同太太及兩女返港居住。

而車淑梅今日就吳耀漢訪問在FB表示,有人曾要求相關訪問延期播出,但車淑梅反對,她表示:「今早播放專訪之前,有外面聲音要我考慮延後播出……我並不同意,原因錄音在事發前,而且吳耀漢哥哥本人的故事充滿正能量,況且事件未清楚,我想無論怎的事情也不應牽連父母……多謝您的支持!」

-----------------------------

蘋果初心不變!26周年「撐蘋果Tee」預售:

你的優惠訂購海外訂購按此

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner