廖啟智離世丨發哥去年已知智叔患癌 發嫂聞噩耗泣不成聲:以為佢可以打贏

更新時間 (HKT): 2021.03.28 23:35

不敵胃癌病逝的廖啟智,生前有做運動習慣,智叔的「行山腳」是發哥周潤發,兩人早年合演電影《無雙》,智叔曾向發哥表示自己受失眠困擾,十分煎熬,後來發哥建議智叔跟他一起行山,讓他放開懷抱。

籲智叔行山改善失眠

在發哥幫助下,智叔的失眠改善了,但沒有想到去年突然發現胃部不舒服,入院檢查後才知情況嚴重。《蘋果》今晚將噩耗告知發嫂:「發哥已瞓咗,我唔叫醒佢,唔係佢一定瞓唔返,我聽朝先同佢講。其實我同發哥上年已經知道,有叫佢加油,我哋以為佢可以打贏呢場仗,諗唔到咁突然⋯⋯真係好難過,原本我同發哥想去醫院睇佢,但院方唔批准探病,智叔係好好先生,我老公是好欣賞智叔,之前都緊張問住佢狀況,諗唔到⋯⋯」發嫂已泣不成聲。

與發哥及智叔一起行山的方中信以短訊回覆:「剛收工,接到方平的電話,心裏難受,不想多講,請原諒。」至於江美儀則在社交網站貼出與智叔的合照並留言:「有緣認識到你是我的榮幸,遺憾是一直沒有機會同你合作,我會永遠記住你跑得好快但成日都返轉頭等埋我哋!願你離苦得樂,南無地藏王菩薩!」

至於曾與智叔合作多部電影的杜琪峯表示,今晚與朋友吃飯剛問起智叔病情,想不到回家途中就收到智叔去世消息,他表示:「一個咁好嘅演員,咁早離開,好難過,我見過咁多演員,智叔係好專業、性格又好,係演員嘅榜樣,佢嘅離開,係電影界損失,希望敏兒同佢家人可以節哀順變!」而黃秋生對智叔離世則歎人生無常,對於智叔死訊,他以短訊回覆說:「佢好人到不得了。哎⋯⋯佢兩夫妻我都好欣賞。」

-----------------------------

蘋果初心不變!26周年「撐蘋果Tee」預售:

你的優惠訂購海外訂購按此

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner