吳耀漢彈TVB對藝員孤寒 過檔亞視薪酬跳升百倍

更新時間 (HKT): 2021.03.28 16:18
(資料圖片)

吳耀漢接受車淑梅港台《舊日的足跡》訪問中,大方講到以前被相士批中他有15年大運行,有名有利;而他又揭露自己在亞視拍經典節目《吳耀漢攪攪震》時,一輯13集的節目,收下拍一部電影、時值100萬的報酬。

吳耀漢憶述,自己與朋友一齊去睇相,那位師傅批言:「35至50歲行15年大運,有名有利。」吳耀漢當下不以為然,認為有名自然有利,後來才發現也不然。吳耀漢到35歲才加入娛樂圈,全因為曾入過電視圈、後來從政的周梁淑怡,時任《雙星報喜》監製的周梁淑怡因為幫襯吳耀漢太太的髮型屋,因而邀請吳耀漢加入做幕後,一起度橋,雖然人工不高,500至1,000元不等,但吳耀漢抱着一試無妨、貪得意當玩的心態答應,後來因為有老闆提議他自己度的橋自己演,吳耀漢才轉戰幕前。

為周梁淑怡做廉價勞工

身為一名「新丁」,吳耀漢之所以能在1976年播出的《點只汽水咁簡單》中孭飛,全因有贊助商向周梁淑怡要求「唔准用《歡樂今宵》啲人」去開節目,周梁淑怡問過吳耀漢意見,雖然酬勞很少,只有數百元,但吳耀漢因為十分欣賞周梁淑怡的才能,又考慮到可能會是一個機遇,所以仍然決定接拍。節目後來想添食,可惜人工談不來,他當時向周梁淑怡坦言:「因為啲錢實在唔得實際,我而家同你孭住個騷,我知道而家個收視係好好,但係你哋再簽過13集嘅錢畀我,反映唔到個節目有幾成功。」

對於大台人工奀,吳耀漢剖白大台的「想法」:「無綫由開台到今日,未試過好慷慨咁對佢哋啲藝員。『我要你上你就上,上咗你要多得我畀機會你上,所以你上緊,我已經畀機會你,仲要畀埋錢你?唔餓死你算好啦!』佢哋係咁樣嘅觀念,咁我咪叫佢去死囉!我唔會死,不過你死囉!」離開後的吳耀漢用自己在髮型屋賺的錢去投資拍戲,親自寫劇本,幸好票房成有錢賺,令吳耀漢把握這個「機遇」,自資創立電影公司。

13集節目穩袋百萬

要提吳耀漢在電視界最令人留下深刻印象的,必定是他為亞視拍的《攪攪震》,與《點只汽水》拍同樣集數,為何《攪攪震》一而再的添食?吳耀漢透露今次都是靠周梁淑怡從中撮合:「嗰時我話13集,大家試吓啦,睇吓鍾唔鍾意。嗰時佢去到亞視做總裁,話晒事,嗰個時代係林建岳揸弗,佢就即刻搵周梁淑怡搵一班人返嚟,當時仲有曾志偉同林敏聰等成班。(點解拍咁多集?)因為錢囉!我嗰時同林建岳講,我同你拍13集,3個月時間,就係我拍一部戲嘅時間,我拍呢個就唔拍戲,(林建岳)畀到拍一部戲嘅酬勞我,前所未有㗎!大家簽晒合約,唔准講出去,佢話畀人知道我畀幾多錢你就不得了。」

問到吳耀漢當年片酬,他坦言:「公價係100萬。」令車淑梅不禁譁然,認為該金額對當時的電視台來說,是個天文數字。吳耀漢續指:「1989年我同佢拍咗3輯,後尾佢寫咗一個劇集畀盧海鵬拍,盧海鵬啱啱過檔,但原來佢合約唔准佢拍住,嗰套叫《司機大佬》,(我)夾硬頂硬上,睇錢份上話好,我就咁一年喺亞視搵咗400萬。」

早前通波仔:好可怕

另外,現年81歲的吳耀漢近年深受腎病困擾,以往他曾透露自己因為腎衰竭,需每日洗肚(腹膜透析)來清走毒素,他向車淑梅表示:「個腎就冇得傾喇!」他指幸好在將軍澳醫院有一間好好的腎科中心,專門照顧他這類病人,「因為我未惡化到要洗血,我仲可以洗肚,佢教識咗我之後,我而家每日喺屋企用藥水洗肚。」

而他亦提到自己心臟有問題,更形容為「好可怕」,他透露自己在10年前在公立醫院做過通波仔手術,「因為嗰時好嗰啲支架,好多時都會塞嘅,(發覺唔舒服?)呼吸同氣喘嗰啲問題都出嚟,應該係要有咁快得咁快去處理,但係喺政府醫院排期要一年半,先可以做個超聲波去睇吓係咩問題。」礙於這是每天都要面對的問題,吳耀漢心急如焚,幸好經朋友介紹心臟科專科醫生為他治理,而且不用等,費用只是比公立醫院貴少少。他指,自己有病,整個人「冇晒氣力」,因為呼吸受影響,好似血都流不到去心臟一樣。

-----------------------------

蘋果初心不變!26周年「撐蘋果Tee」預售:

你的優惠訂購海外訂購按此

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁