廖啟智離世丨智叔兩年前計劃執導處女作《翻兜人生》 田雞為好友圓遺願

更新時間 (HKT): 2021.03.29 15:14

廖啟智敵不過癌魔,昨晚病逝,終年67歲。有指智叔去年確診後便全面停工接受治療,他一直祈盼康復後再戰影壇,智叔一生對演藝圈貢獻良多,他早前更與田啟文(田雞)打算開拍電影《翻兜人生》,希望提攜有志加入本港影圈的年輕人,即使智叔卧病在床,但仍然念念不忘這個大計,現在卻成為智叔遺願。

田雞今日接受《蘋果》電話訪問時表示,一定會繼續完成智叔這套戲。問到田雞何時獲悉智叔患有胃癌?他說:「我知道智叔有胃癌嘅時候,同達哥(吳孟達)一齊差唔多前後腳時間,當時已經係第四期,佢都好積極接受治療,佢亦好有信心可打贏呢場仗,可惜就……」

田雞謂與智叔一直有保持聯絡:「佢走前一日仲有覆我,佢噚日走,我咁啱病咗,又屙又嘔,到我醒番,佢就啱啱離開,我同佢每日都有保持緊密聯絡。不過佢冇同我透露病況,報喜不報憂。」會否協助智叔家人處理身後事?田雞續說:「我哋全行都會幫手,睇吓佢屋企人需要我做啲乜,我哋咪去配合,後事以佢屋企人意願為最優先,我同佢屋企人講咗有咩要幫手就幫手。」

田雞和智叔均熱愛電影,二人一直構思開拍《翻兜人生》,內容是講人生,該片原定想去年底開拍,「智叔諗住自導自演,我就做監製,不過因為佢病咗,計劃延後,又想搞啲個劇本。即使佢留院,我哋都有保持聯絡」。田雞又指電影已有劇本在手:「原本係智叔啲學生搞,而家加咗有經驗編劇一齊搞,會有一啲調整,心目中都有角色人選,希望5月或6月可以開拍。」從影逾40年的智叔,一直有意做導演,無奈癌魔把他帶走,令他未能圓夢,智叔的演藝生涯有着遺憾。

「係後生畀機會我」

《翻兜人生》2018年獲香港亞洲電影投資會(HAF)挑選為「綠燈行動」資助電影之一。智叔當日出席影視博覽,介紹自己的電影:「人生冇take two,所以若有機會重來,要珍惜生命。」電影故事講自殺身亡的主角突然醒來,有24小時去彌補生前的遺憾,發現生前過的生活一團糟,輕生更為家人帶來沉重包袱。

智叔時仍在浸大教書,當日亦有多謝電影年輕人,稱在學生有如鏡子:「睇到佢哋就睇到以前我好似佢哋咁有火,對夢想有熱誠,而家係後生畀機會我,希望有機會用另一形態去試吓。」

-----------------------------

蘋果初心不變!26周年「撐蘋果Tee」預售:

你的優惠訂購海外訂購按此

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner