譚詠麟讚姜濤有器量風度 冀花姐帶MIRROR過台交流:重振樂壇

更新時間 (HKT): 2021.03.29 23:40
(微博圖片、資料圖片)

多得開台已53年嘅TVB,喺上星期舉行嘅節目記者會上,搵個無乜人識嘅藝人鄧智堅嚟惡搞入行只得2年幾人氣男歌手姜濤,仲搵埋一開聲就足以令人震耳欲聾嘅林盛斌(Bob)及麥美恩等嚟做「炸両」,對鄧智堅扮嘅「薑蓉」喊打喊殺。事後固然令班「姜糖」嬲到爆,更令明明唔係姜濤fans嘅網民都認為大台「大蝦細」,覺得大台咁樣公然惡搞姜濤,只係證明姜濤人氣勁,更顯得大台小器。加上姜濤同經理人「花姐」黃慧君事後大方回應,明顯姜濤一方攞晒分,大台偷雞唔到蝕渣米。

原來撐姜濤嘅不單係姜糖同有雪亮眼睛嘅觀眾,「樂壇校長」(a.k.a.樂壇燈神)譚詠麟都有睇報紙留意呢件事,佢喺微博出post讚姜濤同花姐,譚校長話:「少見的年輕一代藝人回答得那麼大方得體有氣(器)量及風度,大事化小、小事化無。經理人花姐教得好,加油!有機會帶Mirror上去《聲夢》交流下,大家良性切磋,百花齊放,重振昔日香港樂壇!」

網民批:想燈姜B

雖然譚校長貌似以長輩身份來「評理」,不過網民唔多buy,有網民喺網上討論區開post討論,好多人都叫譚詠麟讓開,認為佢已經不合時宜:「以為自己真係校長?」另有人覺得譚校長只係牆頭草,跟紅頂白,語氣不屑。

另一方面,有網民擔心姜濤咁樣被譚校長「加持」過,影響堪虞。其實網民嘅擔心都唔係冇根據,以往唔少被譚校長讚過嘅歌手,星途都「與別不同」,好似梁漢文、李蕙敏、李克勤、閻奕格、關楚耀、李幸倪(Gin Lee)、林欣彤及樂隊Mr.等,幾乎都無一倖免,當中亦只有Gin Lee有網民集氣幫手撐住,李克勤則「自力更生」,至今仍叫做有歌出吓。亦有網民對譚校長調轉槍頭撐姜濤,質疑佢怕唔怕激嬲多年老友、現為TVB副總經理嘅曾志偉。

BTW,想提返譚校長,《聲夢》係個歌唱比賽(或叫真人騷),而姜濤本身已經係參加ViuTV歌唱比賽節目《全民造星》出身,並且係攞冠軍嘅,應該都唔使嘥大台啲寶貴quota畀姜濤。如果譚校長只係「打錯字」,係想叫姜濤去「星夢」唱片公司去切磋的話,相信……個期都真係要度度先。

-----------------------------

蘋果初心不變!26周年「撐蘋果Tee」預售:

你的優惠訂購海外訂購按此

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner