田蕊妮經歷時間巨輪看透得失 籲不要盲撐︰香港人係有質素

更新時間 (HKT): 2021.03.30 00:30

離開不是結束,而是另一個開始。

43歲的田蕊妮,去年4月離開工作了12年的TVB,為她的電視生涯畫上句號。然而她的事業上,又有另一番新挑戰,為老公杜汶澤打理網台「喱騷」做老闆娘、簽藝人王宗堯做其經理人、開個人頻道、演舞台劇等多元化發展。人生如戲,早已看透得失的阿田,坦言未有移民的打算,更無懼會否「被標籤」,她認為只要不是盲撐,香港人是有質素的。

看透得失

常言「大樹好遮蔭」,但近年大台不論台前幕後人才流失,當中不少小生、花旦都走得就走,田蕊妮就是其中之一。離開大台後,對阿田來說有何得與失?她坦言︰「我而家做人好求其,得失有乜所謂,真㗎!你呢一下覺得係失,但下一下喺失入面又得到好多嘢;你呢下係得,但你又失去好多,其實你係唔會知。我唔覺得有得失,尤其喺呢個轉變得咁快嘅年代,而家我反而好放鬆。」

田蕊妮16歲參加亞視舉辦的第四屆《未來偶像爭霸戰》歌唱比賽奪金獎入行,雖然起步是唱歌,但往後她卻在演戲方面建立演藝事業,2013年是她事業的高峯期,她憑劇集《巨輪》姚文英一角封雙料視后。此刻阿田回首過往種種,坦言︰「你講得啱,以前我好着重得失,我會好多嘢諗,好多計算,令到個人好緊張,而家呢啲計算係一個好戇居嘅諗法。我對自己有信心,經歷過咁多嘢,對人嘅睇法有所體會,亦對自己有深刻認識,點面對自己,我反而輕鬆咗。人生如遊戲一場,得失又何須咁認真。」

未計劃定居台灣

提起田蕊妮,便聯想到她的老公杜汶澤。男的說話經常夾雜着粗口,女的說話優雅,看似風馬牛不相及,兩人卻結婚16年,依然恩愛。某程度上阿澤對阿田是有影響的,「話冇,你都唔信啦!如果冇影響,我實在太硬淨啦,哈哈哈!」阿田坦承曾說了一句好傷阿澤的說話,就是「你連累到我」。現在阿田坦言早已沒有這個想法︰「兩公婆互相影響係一定有,睇返我哋嘅關係,我幾肯定咁話,杜汶澤唔可以冇咗我,我都唔可以冇咗杜汶澤。兩個互相影響,學習成為更好嘅人。」此刻問阿田最想跟阿澤說句甚麼心底話,她開懷笑謂︰「咁老土,畀你哋聽得都唔係心底話啦,哈哈哈!」隨即她又降低聲量,輕聲甜笑對鏡頭快說︰「I love you !」贏得現場一片笑聲。

向來敢作敢言的阿澤,自去年12月離港赴台拍節目至今仍未返港,與太太阿田分隔兩地,難免有相思之苦,問阿田可有掛住老公?她提起嗓音︰「梗係掛啦,好掛住,唔通跳起話『yeah!佢終於唔喺屋企。』其實而家好多人都係咁嘅情況,有時都幾正,兩個人一齊咁多年,短暫分開反而覺得佢喺我心目中位置係好重要,或者佢會覺得我老婆真係好好。」

近年香港的轉變,不少香港人都打算移民,既然阿澤已在台灣工作,阿田可有打算與阿澤定居台灣?阿田說︰「我哋冇plan,亦冇乜長遠計劃。經過呢幾年,我覺得做好眼前嘅事,舞台劇排好佢,當最後演出亦係正面嘅動力。曾經有人問我,對未來點睇?我冇睇法,而家呢一刻就係我哋嘅未來,呢一刻亦係我哋嘅過去。過往嘅經驗帶畀你行好呢一步,自然就有未來,呢個係我同老公好一致嘅諗法。」

無懼「被標籤」

自言幫老公阿澤打理網台「喱騷」如打雜的阿田,早前簽下包薪藝人王宗堯,近日又與曾編寫舞台劇《5月35日》的劇作家莊梅岩合作,問阿田可有擔心「被標籤」?阿田慎重想了想說︰「呢個世代,標籤係避免唔到,我唔介意標唔標籤嘅問題,但我唔係咁睇,究竟佢哋嘅立場係咪基於政治先,大家都有少少混淆。我反而睇到,佢哋做緊嘅事,只不過係佢哋由心而發嘅反應。由細到大,一路都係咁,佢哋見到唔公平、唔公義嘅事情,就會講出嚟,不嬲都係咁,佢哋只係做返不嬲嘅嘢,我就係咁樣睇,而佢哋幾個不嬲都係咁樣。」

阿田還補充說︰「無論政治立場係點,實質上莊梅岩係一個好有才華嘅劇作家,佢寫得好好。我反而覺得要知嘅,唔係有冇被標籤,有咩政治立場,而係你係咪真係有料。好似我哋去黃店,冇理由難食你都盲撐,係要有質素,我覺得香港人係有質素,而莊梅岩就係一個好有質素嘅人。」

-----------------------------

蘋果初心不變!26周年「撐蘋果Tee」預售:

你的優惠訂購海外訂購按此

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner