田蕊妮愛演戲珍惜每個演出機會 視今次舞台劇︰係最後一次演出

更新時間 (HKT): 2021.03.30 00:30
田蕊妮與甄詠蓓合作舞台劇。

曾是大台視后的田蕊妮,將於4月底參演莊梅岩編劇、甄詠蓓(Olivia)導演的舞台劇《聖荷西謀殺案》,與潘燦良演夫妻。演戲絕對難不倒阿田,但世事難料,刻下疫情仍未終結,任何可能性都隨時會發生。然而鍾愛演戲的阿田,視演戲如放假,更珍惜當下每個演出機會,她更不諱言︰「我當今次係最後一次演出。」

無懼比較

今次是舞台劇《聖荷西謀殺案》第四度公演,之前3次都由劉雅麗主演、李鎮洲導演,兩人於2010年「第19屆香港舞台劇獎」中,分別獲最佳女主角(悲劇/正劇)及最佳導演(悲劇/正劇)。前者有漂亮的成績,加上鄭秀文曾演過《聖》劇的電影版,難免會被人作比較,難得阿田沒有擔心過,「觀眾會比較係無可厚非,作為演員,我覺得演戲係冇得比較,因為唔同演員演同一個角色,一定有唔同,角色就好似張畫紙,演員就係畫家,你點去畫幅畫,每個人都會呈現唔同嘅嘢,而我有信心呈現一個唔同嘅阿Ling(劇中角色)出嚟。我相信Olivia點解搵我演,佢一定覺得我係適合,我亦好相信莊梅岩嘅選擇,我絕對唔擔心。」Olivia亦有同感:「各有唔同嘅化學作用,反而我好期待演員點塑造佢哋嘅角色,同佢哋本人會好唔同,觀眾未見過佢哋嘅另一面。」

談及角色阿Ling是個美麗女人,卻做了一些不美麗的事,更令男人黐線,阿田認為愛情與麵包,阿Ling原先是揀麵包,卻一不小心揀錯了愛情。而阿田的愛情觀,只覺得美麗的事會一閃即逝;當發生愛情後,兩人走在一起,相處才是人生最難的學問。不過阿田很理解阿Ling的性格,更不諱言大家有共通點,她笑謂︰「阿Ling係個好包容嘅女人,好溫柔,而且好愛佢老公,我覺得我都係囉!」說罷阿田笑過不停,在旁的Olivia忍不住說︰「你贏晒啦!」阿田一臉嬌俏的說︰「佢(指阿澤)知㗎!」

在導演Olivia眼中,阿Ling是個複雜的人物,而這是個毀滅的故事,愛得深滅得深︰「我嘅愛情觀就係要小心。」她認為要有人生閱歷才能演活阿Ling這角色,阿田正是她的不二之選︰「佢係一個果斷又勇敢嘅人,有一種自我。而莊梅岩就覺得阿田好靚,佢有呢種質地。佢連阿澤都可以控制住,冇人控制唔到!」

演戲當放假

去年離開大台的阿田,原本打算到法國修讀戲劇課程,可是疫情關係無奈要擱置。近期她接觸更多不同工作,如幫老公打理公司,有得演戲反而覺得是放假,「舊年12月公司剛開始,有好多嘢要建立,同我之前嘅工作性質完全兩回事,有好多嘢要學,係有壓力。所以有機會畀我做返演員,返去我最熟識嘅地方,我直頭覺得係放假,所以我好期待。」

舞台劇將於4月底公演,近日阿田等人都密鑼緊鼓開始排戲,阿田坦言好珍惜今次演出機會,更視今次為「最後的演出」,她說︰「我係好鍾意演戲,亦唔會放棄。但而家好多嘢話唔埋,因疫情劇場開定唔開,做定唔做,唔知道下一刻會發生咩事,所以我將每樣嘢當最後嚟做。」工作上,可以掌控在自己手中,阿田感受到那份自由,她說︰「係呀!我好珍惜每個moment,見嘅每個人。當你真心去對人,唔會有咁多計算,反而令自己放鬆咗,而家乜嘢都當最後嚟做,珍惜我每次嘅工作機會。」

-----------------------------

蘋果初心不變!26周年「撐蘋果Tee」預售:

你的優惠訂購海外訂購按此

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner