【娛樂人物】拒盲撐黃店 着重質素 
田蕊妮為公義無懼被標籤

更新時間 (HKT): 2021.03.30 02:00

現年43歲的田蕊妮,去年4月離開工作了12年的無綫,為她的電視生涯畫上休止符。然而她在事業上另一番新挑戰,為老公杜汶澤打理網台「喱騷」做老闆娘、簽藝人王宗堯做經理人、開個人頻道、演舞台劇等多元化發展。人生如戲,早已看透得失的阿田,坦言未有移民打算,更無懼「被標籤」,她認為只要不是盲撐,香港人是有質素的。

常言「大樹好遮蔭」,但近年無綫不論台前幕後人才流失,曾奪視后的田蕊妮就是其中之一。離開後對阿田來說是得是失?她日前在尖沙嘴接受《蘋果》訪問,回想2013年是事業高峯,在無綫憑《巨輪》封雙料視后,阿田稱︰「以前我好着重得失,我會好多嘢諗,令到個人好緊張,𠵱家呢啲計算係好戇居嘅諗法。經歷過咁多嘢,對人嘅睇法有體會,亦對自己有深刻認識,點面對自己,我反而輕鬆咗。」

冇咗阿澤唔得

阿田與杜汶澤結婚16年依然恩愛,她坦承曾說了一句好傷阿澤的說話,就是「你連累到我」,現在她早已沒有這想法︰「兩公婆互相影響係一定有,睇返我哋嘅關係,我幾肯定咁話,杜汶澤唔可以冇咗我,我都唔可以冇咗杜汶澤。兩個互相影響,學習成為更好嘅人。」此刻問阿田最想跟阿澤說句甚麼心底話,她輕聲甜笑快說︰「I love you!」

綜觀近年香港的轉變,不少香港人都打算移民,既然阿澤已在台灣工作多月,阿田可有打算與阿澤定居當地?她說︰「我哋冇plan,亦冇乜長遠計劃。經過呢幾年,我覺得做好眼前嘅事。曾經有人問我對未來點睇?我冇睇法,𠵱家呢一刻就係我哋嘅未來,呢一刻亦係我哋嘅過去。過往嘅經驗帶畀你行好呢一步,自然就有未來,呢個係我同老公好一致嘅諗法。」

由心而發反應

「喱騷」早前簽下王宗堯,阿田近日又與曾寫舞台劇《5月35日》的莊梅岩合作,問阿田可有擔心「被標籤」?她說︰「呢個世代,標籤係避免唔到,我唔介意標唔標籤嘅問題,但我唔係咁睇,究竟佢哋嘅立場係咪基於政治先。我反而睇到佢哋做緊嘅事,只不過係佢哋由心而發嘅反應。由細到大,一路都係咁,佢哋見到唔公平、唔公義嘅事情就會講出嚟,佢哋只係做返不嬲嘅嘢。」

阿田續說︰「無論政治立場係點,實質上莊梅岩係一個好有才華嘅劇作家。我反而覺得要知嘅,唔係有冇被標籤,有乜嘢政治立場,而係你係咪真係有料。好似我哋去黃店,冇理由難食你都盲撐,係要有質素,我覺得香港人係有質素,而莊梅岩就係一個好有質素嘅人。」

撰文︰羅婉玲

娛聞樂陪你走遍全球追星,即Like「娛果」FB 專頁!
BannerBanner