譚詠麟接種科興冇不良反應 被問新疆棉掀抵制:問我把鬼呀!

更新時間 (HKT): 2021.03.30 18:29
(微博圖片)

譚詠麟(阿倫)今日棄穿平時至愛的Nike或Adidas等牌子,穿上本地品牌KOYO ROCK外套、腳踩西班牙出品的KELME(卡爾美)波鞋,出席港台《香港足球名人堂》啟動禮,向足球名宿致敬。阿倫在席上除了打手印外,更與足球名宿張子岱和黃文偉踢波。

已有差不多兩年沒有在港公開現身的阿倫,早前在大陸做節目掘金,問到是否賺了不少?他說:「唔係講呢啲,起碼有得做,個人有寄託。」提到他3月5日已打科興疫苗第一針,阿倫表示自己本身沒有三高,事前亦已問過家庭醫生,接種後沒有不良反應,他說:「我同朋友一齊打,佢哋過咗兩個禮拜後,就會眼瞓,我都試過日間,一日半日眼瞓,我好少咁樣,不過淨係眼瞓有乜好擔心?4月頭會打第二針。」雖然阿倫講話唔擔心,但就認為打針前應該要再檢查心跳、血壓各方面,而他每年都會做身體檢查。

自稱普通藝人拒談政治

提到新疆棉花風波,最近掀起大陸網民要抵制外國品牌,阿倫表示:「呢啲咁政治化係咩事呀,應該搵返政治人,問我把鬼呀!」他指身上的衣服是由本地設計師設計,並笑指自己只是普通藝人。問他近排有沒有衫褲鞋襪要丟?他說:「避得咁多咩?我有啲係好有紀念性,係歌迷送畀我,如果我着,佢哋又開心,歌迷開心,我又開心,何樂而不為呢!做乜要丟呢?」有網民話要燒衣服波鞋,他即說:「係咩?咁犀利㗎?攞去捐畀人啦!」問到明星足球隊踢波照穿Adidas等外國運動品牌?他只說:「我唔知喎,因為我係職業球員,咩場地就着咩波鞋。」

-----------------------------

蘋果初心不變!26周年「撐蘋果Tee」預售:

你的優惠訂購海外訂購按此

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner