讚姜濤遭網民踩「以為自己真係校長?」
阿倫標汗認閂fb 避睇負評

更新時間 (HKT): 2021.03.31 02:00

無綫上周三舉行節目記者會,派鄧智堅扮姜濤玩惡搞醜化,同場的林盛斌及麥美恩等對他喊打,馮盈盈更大叫「打到你變薑茸」,引來網民狂轟,不過姜濤及其經理人「花姐」黃慧君大方表示並不介意。因撐警遭香港fans唾棄的「樂壇校長」譚詠麟(阿倫),日前忽然在微博讚姜濤:「少見的年輕一代藝人回答得那麼大方得體、有器量及風度,大事化小、小事化無。經理人花姐教得好,加油!有機會帶MIRROR上去《聲夢》交流下,大家良性切磋,百花齊放,重振昔日香港樂壇!」

被嘲典形廢老心態

阿倫語氣回復強勢的校長身份,但網民完全不受落,更指他不合時宜:「以為自己真係校長?」又有人覺得他跟紅頂白。另有網民擔心姜濤被阿倫「燈死」,更列出以往被阿倫讚過的歌手,如梁漢文、李蕙敏、關楚耀、林欣彤及樂隊Mr.等,之後星途都阻礙重重。潘小濤昨日在fb留言嘲阿倫:「典型活在過去嘅廢老心態,以為自己同大台(無綫)都仲係好勁。慳啲啦,MIRROR使你帶?照吓mirror先啦!」

昨日阿倫在港台出席新節目啟動禮,他接受訪問時滿頭大汗,手上還拿着紙巾抹汗。提到他的撐警好友曾志偉近日返無綫做副總經理,阿倫透露和對方通電話通得好密,至於是否做智囊團,他坦言:「佢問我,我咪提吓囉,我話一定要做好音樂節目,做好香港樂壇,唔好分你台我台。」阿倫又表示有留意姜濤,亦有收看ViuTV:「我由佢開始訓練已經有睇,覺得呢個男仔肥肥哋,幾過癮。」阿倫之後再次讚姜濤EQ高,問他怎樣看無綫惡搞姜濤?阿倫認為:「我覺得佢唔會擺喺心,fans擺喺心就一定㗎喇,fans諗埋一邊,我哋都慣咗。」

着支持新疆棉波鞋

至於網民對阿倫讚姜濤的言論有不少意見,他指自己在前年年中已關閉fb賬戶:「我唔想睇啫,唔會唔開心,唔係咁多人同你同一個感覺、一樣意見同想法。」至於有網民擔心姜濤被他「燈死」,阿倫說:「我都講過G.E.M.(鄧紫棋)同Eason(陳奕迅),又唔見你哋講。」不過Eason最近捲入新疆棉花風波,阿倫則說:「問呢啲咁政治化嘅事,應該搵返政治人,問我把鬼呀!」阿倫又指不會刻意避忌外國品牌:「避得咁多咩,我有啲係好有紀念性,係歌迷送畀我。」

其實阿倫平日愛穿Nike或adidas等牌子,不過昨日一身運動裝的他卻是穿上本地品牌KOYO外套、腳踩西班牙出品的卡爾美(KELME)波鞋,其中卡爾美在上周三爆發新疆棉風波爆發後,翌日即去信中國足協,希望取代Nike贊助中超聯賽和國家隊,甚至連官方微博亦獻媚聲言「力挺中國新疆棉」。

娛聞樂陪你走遍全球追星,即Like「娛果」FB 專頁!
BannerBanner