張國榮逝世18周年丨00後fans追尋哥哥傳奇一生 靠偶像歌曲克服焦慮症

更新時間 (HKT): 2021.03.31 23:58

「風裏笑着風裏唱,感激天意碰着你……」張國榮2003年選擇離開,轉眼已經18年。他的歌迷熱情不減,支持者越來越多,一班「後榮迷」除了搜羅收藏品外,更透過他的作品深度了解,發掘他的個性,從他的內涵讓自己有人生方向,對自己心靈作出鼓勵,張國榮成為他們的「精神領袖」。雖然兩代人未能「同途偶遇在這星球上」,但仍然「燃亮飄渺人生」,能為別人帶來正面影響力,惟獨張國榮才能是真正的傳奇人物!

一班00後出世的「後榮迷」,早前在新蒲崗接受《蘋果》訪問,分別有18歲Annette、19歲Emily、18歲阿King、16歲EY、18歲Alison和16歲Ariel。這一代的年輕人,紛紛轉投K-Pop、J-Pop等,但這幾位「後榮迷」不會害怕被取笑喜歡「老餅」,反而把握機會把張國榮宣揚,Alison會跟喜歡陳百強的母親爭論誰的偶像更靚仔,Emily更自豪說:「佢哋唔會笑我,因為佢哋K-Pop偶像嘅偶像就係張國榮,佢喺韓國瘋魔萬千少男少女,《Running Man》成日喺節目提起張國榮。」

他們受訪時更晒出自己最愛的收藏品,數量當然不及追隨數十年的榮迷,但對他們來說都是難能可貴。有親戚轉送的張國榮親筆簽名、有長輩的遺物白膠唱片,甚至節衣縮食慳錢買到的唱片,他們欣賞張國榮的外表,讚嘆他的才華和電影角色上的迷人,欣賞舊片段時,個個讚他靚仔,Emily更細心得留意張國榮的每一部份:「佢啲腳趾好靚﹗有一次佢除鞋演出睇到。」

以哥哥為學習榜樣

年輕人有自己的眼光、角度去看世界,豈止膚淺地欣賞張國榮的外表!溫文的Annette說:「我13歲就鍾意哥哥,無意中喺YouTube睇到佢嘅作品,跟住慢慢發掘,第一首聽嘅歌係《由零開始》,而我好鍾意佢1997年演唱會,佢形象好前衛,打破以前社會嘅框架,男人點可以着高踭鞋、留長頭髮,我就覺得佢有一種反叛。有少少影響到我,有啲嘢唔合理,唔應該係咁,我就會嘗試打破呢樣嘢,認為唔應該係咁、唔係正義,就嘗試好似佢咁突破社會發聲,我會堅持自己。」

聽哥哥《我》治療焦慮症

EY投入得在今年張國榮死忌前夕,獨力舉辦張國榮展覽,張國榮的說話深深印在她腦海,潤澤自己由谷底走回光明:「佢最後一次公開演唱《我》,之後同好多fans講:『人最緊要係懂得愛人,也要欣賞自己。』呢句好啟發到我,一、兩年前我有焦慮症,當時因為好小嘅焦慮,我會喺屋企行來行去,最嚴重嘅時候我維持咗半年。當我心理狀態唔好,就會重複睇哥哥演唱會唱呢首歌,我覺得要學習佢,愛自己、對自己好啲,我只係睇佢演唱會嗰一個部份,重複一日睇十幾次。不斷講哥哥真係好犀利,喺佢咁辛苦嗰陣,當時傳佢身體狀態唔係咁好,但佢都想傳達一啲訊息畀fans,作為比佢更渺小嘅我,都應該要加油。」自言性格不像傳統女孩般斯文,更曾被老師當眾羞辱,曾討厭自己的性格,但張國榮的說話鼓勵她的心靈,學識放下執着,毋須過於顧慮別人的看法。

哥哥巨星魅力光芒四射,後榮迷亦從他身上學懂努力做自己,活躍的Emily笑說:「我好鍾意睇BL嘅故事,有朋友介紹我睇《霸王別姬》先接觸哥哥,有時聽佢嘅歌紓解心情,同埋學識唔好因為其他人嘅眼光而影響自己。當年佢演唱會,長頭髮俾人鬧不男不女,點解着到咁樣表演,啲人唔理解佢。到佢唱《紅》着高踭鞋,都唔理人點講,佢做自己(嘅態度)不斷提醒我,而我知道佢拍《流星雨》時電影業低迷,佢為咗幫電影業,象徵式收咗一蚊酬勞,用自己能力幫助別人,係好值得學習。」

用生命感動生命

張國榮所做的一切,體現到一個生命正在影響另一個生命。Ariel同樣因為這個原因而喜歡有個性的張國榮,難忘他在《我》作品的一句歌詞「I am what I am」,Ariel續說:「我由細到而家,注重人哋點睇我,做每一樣嘢前會諗有冇人對我有咩改觀,佢咁出名,會叫fans做番自己,或者衣着、揀嘅戲,好代表到佢係好忠於自己。我鍾意嘅嘢,唔係啲乜,只係個人喜好,或者衣着,我可以忠於自己,唔使太理其他人,令自己大膽啲。」

現正在大學修讀電影系的阿King,自言揀選這一科是因為張國榮:「欣賞佢嘅努力、好堅持,遇到挫折不放棄,喺《今夜不設防》訪問,佢講以前辛酸史,好感觸,欣賞佢捱過去,成就咗今日,令我哋仲係咁鍾意佢。讀電影都唔多唔少受佢影響。就算睇完《鎗王》都會想試吓IPSC(射擊),聽完佢嘅歌,都會模仿一下佢唱歌。」阿King欣賞張國榮工作認真,追求完美態度:「欣賞對人態度同對自己要求,所有嘢都做到完美,有時唱到一半唔記得歌詞,佢會重新唱,有啲人會選擇𦧲過或輕輕帶過。」

靠「榮迷」延續真善美

就讀大學設計系的Alison,印象最深是看過一篇榮迷訪問:「有一個fans分享,嗰個人同老公離婚有抑鬱症,半夜喺條街喊,遇上經過嘅哥哥,哥哥好耐心問佢有冇事,一直等佢冷靜落嚟,然後陪佢傾咗成晚,最厲害係之後佢仲繼續得閒就打畀嗰個粉絲,問候吓佢嘅情緒,可惜2003年哥哥走咗。」她最感受到張國榮堅持忠於自己,「我會學佢對人好、講嘢直,佢係想表達自己感受,我學識咗,要多啲關心人,表達自己感受,唔好收埋。以前我唔係好理人感受,好易妒忌,好多嘢好固執,為咗哥哥,我會同人哋多啲交流。」

Emily形容哥哥的擇善固執值得大家學習:「喺呢個世道出世嘅小朋友,會俾好多人質疑,對你有啲偏見,覺得學生淨係得讀書,讀書先有好出路,人哋會對你好多抨擊,我覺得要堅持做自己唔容易,張國榮喺一個比較封閉嘅年代而做到呢樣嘢,佢成日多謝身邊幫佢嘅人。雖然我本身係自我中心,而家仲未做到佢嗰隻humble(謙卑),同埋嗰種感恩嘅人生態度,呢啲我都要學習。」

EY在2017特別開fanpage,由轉載文章,發展到寫電影分析,又開設「後榮迷」IG賬號,本月29日至4月11日舉行《風繼續吹》張國榮18周年紀念展:「唔係內心鍾意就算,佢已經唔喺度唔會有新作品,要發掘深度,先可以令更多人對哥哥有興趣,傳承佢嘅精神價值。」整個展覽由EY獨力籌備,其中更找來5位插畫師重新畫不同角度的張國榮。

-----------------------------

蘋果初心不變!26周年「撐蘋果Tee」預售:

你的優惠訂購海外訂購按此

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner