63歲魯振順自爆婚訊 重遇41年前女同學譜黃昏戀

更新時間 (HKT): 2021.04.01 13:49

現年63歲、有「TVB綠葉王」之稱的魯振順,入行40多年演繹過無數角色,惟獨關於他的感情則鮮有提及,身邊亦不見有女伴,令不少人對懷疑他的性取向。日前魯振順接受范振鋒和林子博主持的新城節目《BiLiBALA開大喇叭》訪問,在節目上自爆婚訊,現任女友是41年前於歌唱比賽認識的女同學,計劃在抗疫成功後結婚。

魯振順自爆艷遇

對於這段「黃昏戀」,魯振順表示獲高人改名為「釋禧」後,重遇41年前曾一同參加歌星選拔賽而認識的女同學:「佢比我後生6年,嗰陣我哋有一齊上堂,不過因為我要兼顧訓練班,邊有時間參加同學聚會,變咗唔算有太多交流,好奇怪,喺舊年佢睇完我啲訪問後,了解咗魯振順,原來我係咁慘,又覺得我好真,居然搵返我。」

信媽媽安排「緣份」

言談間魯振順透露相信緣份,可能是媽媽安排女友來照顧自己,他續道:「我阿媽喺2017年走咗,嗰陣經歷過一啲事,有叫過阿媽帶埋我走,不過佢叫我要好好活下去,唔好亂諗嘢,點知冇耐女友就出現,連佢都話可能係阿媽派佢嚟陪我,好直覺想見我,我第一次食佢包嘅餃子,一食就喊,因為同我阿媽包嘅味道一模一樣,感覺好Warm,所以就更加珍惜。」

魯振順透露一直想組織家庭:「我一直都好渴望有一個家庭,冇遇人不淑,只係遇唔到,我之前見到陳榮峻同吳香倫結婚,我都好嚮往,唔知幾時先到我,可能呢幾年我釋懷咗好多嘢,所以上天安排我遇到呢個黃昏戀。」

抗疫成功即結婚

問到婚禮詳情,他坦言留抗疫成功才會舉行:「我哋計劃大排筵席,到時我哋會唱歌,部份人情可能會拎嚟做善事, 所有嘢由等女友負責,佢成日話要幫我爭番口氣,唔好成日都話我係Gay!」

足本訪問將於2日晚凌晨播出,有傳媒今日向魯振順了解,但未有回覆。好友陳榮峻今日接受傳媒訪問時表示未有聽聞,哈哈笑着說:「唔知,哈哈,真係冇聽過,但恭喜佢先!」陳榮峻表示一入TVB已認識魯振順,相交近40載,對於一直有傳魯振順是同性戀者,陳榮峻說:「咁我知佢唔係基,但從來冇聽佢講話拍拖,乜都冇,所以真係好突然。」

而節目主持人范振鋒今日接受《蘋果》電話訪問,坦言對魯振順自爆結婚感到突然,他說:「傾傾吓佢話而家有拍拖,我哋都好突然,再傾就話會結婚,我反應係『吓』,我心諗緊係男定女呢?真係(咁諗),跟住佢話女。佢自己都講,好多人都覺得佢係基嘅,而家女友係幫佢平反,到時有個新娘出嚟,大家都唔使再亂估,所以都好突然。」問到今日4月1日,這訪問是否愚人節的節目?他說:「因為我哋喺10日前已經錄咗,所以係堅嘅!堅嘅!」

缺乏一個賢內助

魯振順曾經在訪問上表示,在29歲時候曾向拍拖7年的女友求婚,慘被拒婚,分手後前度更自爆曾為他墮胎,當時對他打擊極深, 加上事業不順,結果他試過割脈自殺,其後他把感情事看開,對愛情隨緣,但依然期待遇到一拍即合的人,聲稱自己缺乏一個賢內助,一個成功的男人背後要有個女人。

-----------------------------

蘋果初心不變!26周年「撐蘋果Tee」預售:

你的優惠訂購海外訂購按此

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner