有圖有真相丨魯振順真命女友Juli曝光 拍拖數月已築愛巢

更新時間 (HKT): 2021.04.01 19:13
(受訪者提供)

63歲的魯振順今日驚爆與細他6年、41年前於歌唱比賽認識的女同學計劃明年拉埋天窗。魯振順今日接受電話訪問時笑問記者:「係咪好有夫妻相?」他強調不是愚人節節目,他說:「好多日前做嘅訪問,整鬼喺愚人節播,搞笑呀!(當日)佢哋問我有咩勁嘢,我話順其自然啦,冇心講嘅,講講吓講漏咗嘴,原本諗住遲啲先,都有部署㗎嘛。」

魯振順透露女友英文名叫Juli,二人拍拖僅數月,便決定結婚。他說:「佢都大年紀,我都大年紀,佢話我哋每個人都經歷咗好多人生唔開心嘅嘢,人都成熟,唔係好似啲後生仔女咁,搞啲分分離離,嘈嘈吵吵咁咩,一見面就好似屋企人咁,好多嘢傾,佢成日都笑,見到我就成日笑,佢好開心、好正能量,大家開開心心過日子,又有共同目標、共同興趣,思想亦好脗合。」

他還自爆拍拖經過:「最主要咁,佢知我一個人,佢又鍾意煮嘢食,問我想食啲咩,煮畀我食。咁我話鍾意食餃子,因為我阿媽2017年走咗,我食佢包嘅餃子,第一啖已經即刻喊,因為味道好似我媽媽包嗰種啲味道,佢話『可能係你阿媽叫我嚟照顧你』。」為Gay平反?他說:「佢講咋,話幫我爭番口氣,感覺到我受嘅委屈,佢話你冇講到啫,但我感覺到。佢真係明我,呢個世界上好難遇到一個懂你嘅人,在我哋嚟講,係守得雲開見月明啩。」

知生仔機會渺茫

問到有沒有同居試婚?他認真地說:「冇冇冇,要尊重女方。我住我,佢住佢,我哋遲啲會安排...其實已經安排咗。」原來二人已覓得新居,「其實搵咗間新屋,想重新再嚟,我哋各自都收藏好多嘢,屋企好似小貨倉咁,兩個都好頭痛,仲要斷捨離。我哋都好似細路仔咁,人哋都話頂我哋唔順,哈哈。」魯振順多年來努力搵錢,被指擁有兩個物業,他透露女友同樣好叻女,大家「財力」不相伯仲:「佢讀書考第一,都搵到錢㗎,所以我咪話大家環境好平均,我仲驚人講話我黐佢添呀!富家女?咁又唔係,佢人生都係一個人過日子嘅人,真係上天安排!」談到生兒育女,魯振順笑言自己4月尾便64歲,女友也50多歲,雖然機會渺茫,但仍抱有希望:「我都好鍾意小朋友,好多嘢好難講,可能上天畀我呢,一切順其自然,不過女友都講過可能會領養。」

問到黃昏戀會否有壓力?他說:「唔會,我哋有共識,我哋過我哋嘅日子,又唔係為人而生活,最主要我哋兩個健健康康,開開心心。」他們計劃明年底結婚,但仍要視乎疫情控制,還希望能找到婚紗及禮服贊助,他說:「拍劇就着過好多次,但屬於我自己就冇,點都要着。」

-----------------------------

蘋果初心不變!26周年「撐蘋果Tee」預售:

你的優惠訂購海外訂購按此

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner