阮大勇兒子向哥哥致敬 手繪巨型肖像貼巴士遊遍偶像足迹

更新時間 (HKT): 2021.04.01 00:00

80年代香港電影的海報,可謂別樹一幟,當中的靈魂人物阮大勇,曾為不少經典電影畫下生鬼有趣的海報,包括《天才與白痴》、《半斤八両》、《陰陽錯》等等,他的46歲兒子阮繼增(Jimmy),遺傳了父親的藝術細胞,現時任職園境師,隨時拿起一支筆,都可以畫出一幅美麗的作品。Jimmy更將自己的專長,在工餘時間為偶像張國榮(哥哥)和李小龍作出一點心意。

去年開始,Jimmy先後為哥哥和李小龍以手繪形式繪畫兩人的造型,分別貼在巴士及電車車身上,他說:「雖然我每年都冇參與紀念哥哥嘅活動,但上年因為疫情,紀念哥哥嘅活動全部取消晒,我覺得呢隻菌都幾霸道,而我好期望自己作品擺喺巴士或者電車,所以就構思咗另一種紀念形式,嘗試將哥哥嘅樣擺喺巴士車身上,令到更多人喺街上行過都會見到。紀念哥哥之餘,亦可以當係一個戶外嘅展覽藝術形式。」

坐巴士偶遇哥哥

Jimmy去年繪畫哥哥手執鮮花的造型,印製12幅巨型海報,貼在不同型號的巴士車身上,雖然哥哥曾拍下不少相片,但Jimmy在揀相過程都要想過度過。「一定要揀清晰啲嘅相,因為張相要放大,放喺車身上,我都要喺面部輪廓上畫得細緻啲,如果啲相太矇,我好難做到參考。至於造型方面,我都要揀另一張相,點解要畫哥哥捧住束花,因為我喺網上見到哥哥啲花都係以百合花為主,同埋百合花亦有一個紀念嘅含意。」花了幾晚時間趕工,哥哥的繪圖終於完成,當親眼目睹自己為偶像畫的繪圖貼在巴士車身上,並穿梭哥哥昔日走過的街道,Jimmy坦言感到很開心,更可讓「榮迷」隨時在街上見到哥哥。他說:「當時反應好好,日本、韓國嘅『榮迷』都私訊我,佢哋都好想坐,但可惜因為疫情嚟唔到香港。」

問到畫哥哥和李小龍有甚麼困難的地方?Jimmy說:「李小龍可能易畫少少,哥哥……其實畫到佢哋嘅神韻係最重要,同埋唔好醜化佢哋;其實畫李小龍,線條可以粗獷啲,但畫哥哥時就要幼細啲,因為大家走嘅路線係截然不同。」Jimmy選擇巴士作為載體,源於他與哥哥一次相遇,他說:「我記得有次坐巴士入赤柱,喺大潭水塘嘅水壩見到哥哥揸住架保時捷,迎住我方向出嚟,我都幾肯定係哥哥。」問Jimmy本身是不是巴士迷﹖他表示:「我係有段時間鍾意過巴士,但都係好耐以前嘅事,連嗰間巴士公司都執埋笠喇,我對現時嘅巴士型號其實冇乜認識,到我要搞哥哥紀念巴士,我先開始研究吓邊啲巴士型號會靚啲。」

首次/最後合照

今年是哥哥逝世18周年,Jimmy決定再與巴士公司合作,沿用去年所畫哥哥的造型,由於哥哥是香港的icon,所以今次會加插香港著名景色為背景。談及有傳是Jimmy自資,他說:「兩次我都冇收取任何設計費用,係非商業性質,今年係18周年,同巴士公司傾,可唔可以將哥哥個樣擺喺18部巴士,巴士公司都好開心,佢哋都好鍾意我去年嘅作品,所以由4月1日開始,會有18部巴士喺全港行走,包括哥哥留下足迹嘅地方,例如荷李活道、中環、山頂等等,為期大約一個月。」點解今年不繪畫哥哥其他經典角色?Jimmy說:「因為今個月頭我有個李小龍電車相展,都花咗好多時間,所以今年就用返上年哥哥嘅造型。」

李小龍和哥哥,一剛一柔形象截然不同,但同樣是Jimmy多年的偶像,他表示:「有次電視台重播《精武門》,見李小龍一個打廿個,好精采,正式封咗佢做偶像;至於哥哥,我嗰陣讀緊小學,當時正值考試,聽到鄰居播緊哥哥啲歌,印象好深,『嘩,首首都好好聽喎!』當時播《Monica》、《Stand Up》、《第一次》,因為咁樣我就鍾意咗聽哥哥啲歌。後來自己有經濟能力,我就買返晒哥哥所有唱片,我同家姐亦有去睇《跨越97演唱會》,佢當時同觀眾握手,我咪即刻衝落去,叫家姐揸機,影咗人生第一張,亦係最後一張合照。」

李小龍和哥哥這兩位巨星各有吸引之處,但亦影響了Jimmy的人生觀,他說:「李小龍功夫好勁,氣勢好強,而且佢有套哲學,同以前《孫子兵法》有啲相似,例如佢身材冇西方人咁大隻,但速度就勝過其他人,所以佢將長處盡量發大彌補自己嘅缺點;至於第一次聽哥哥啲歌,就係我小學最好成績嘅時候,當自己考得差,就會聽返哥哥啲歌,希望聽完可以令自己開心啲,等自己心情冇咁低落。」有沒有試過追星?Jimmy笑說:「冇,因為媽媽管教好嚴,我有偶像都唔敢話畀佢哋知,我都係買吓唱片咁咋。」

驚訝爸爸忘年婚姻

Jimmy的畫功與爸爸阮大勇十分相似,都是頭大身小,他表示小時候最愛就是待在爸爸身邊,看着爸爸畫畫,「佢畫好多李小龍,對我嚟講無疑有啲推動力。」提及父子情,Jimmy表示與爸爸的相處時間很少,因為爸爸每日打兩份工,在他印象中,爸爸總會帶笑,而媽媽則是全職家庭主婦,管教甚嚴,對他的學業要求很高,他笑說:「爸爸見我考到好成績,咁咪讚我囉!」對於阮大勇曾經接受訪問時講過「我糊裏糊塗過咗幾十年,好慚愧沒有好好照顧一對仔女。」Jimmy聽到感到很愕然,似是不相信爸爸會講這番說話,他停頓了一會才說:「好surprise佢用『慚愧』呢兩個字,好意外;我心目中嘅爸爸,好少過問我哋學業、好少問我同同學嘅相處,但佢會帶我去玩,我記得有次考試要溫書,但爸爸捉咗我出去玩,其實我心裏頭係寧願溫書,無啦啦拉咗我出街,冇咗幾個鐘頭溫書,心諗咁搞法,好難同其他同學仔鬥㗎喎!」當Jimmy的媽媽離世後,Jimmy得知爸爸與相差31年的酒店公關許慧韶(Virginia)再婚,他坦言感到很驚訝,不過想深一層又覺得理所當然。「其實維持佢一貫嘅性格,如果係佢鍾意的話,佢行動會好快。而家爸爸喺台灣生活,我哋好少見面,因為上年疫情關係,佢冇返香港,直到最近先返嚟,因為佢80歲大壽,我哋一齊慶祝完,爸爸就會返台灣。」

Jimmy經常用工餘時間畫畫,陪太太的時間自然減少,他說:「藝術創作唔係一畫就成功,有時我畫人像,可能第一次自己唔滿意,嗰幅作品就會報廢,然後再畫過,所以太太有時都有抱怨,覺得我成日匿喺書房入面,不過佢唔會阻止我,會畀空間我。」自知陪太太時間不多,所以Jimmy早前決定與太太staycation,不過他仍心繫哥哥,帶埋notebook去酒店,為哥哥巴士繼續設計,太太只好打機過日辰,太太給他無限量的空間和時間,Jimmy當然心存感激說:「我太太係好好嘅!」

場地提供:Playground (Entertainment) Limited

-----------------------------

蘋果初心不變!26周年「撐蘋果Tee」預售:

你的優惠訂購海外訂購按此

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner