拍拖數月已覓新居築愛巢 
63歲魯振順 明年娶女同學求天賜B

更新時間 (HKT): 2021.04.02 02:00

現年63歲、有「綠葉王」之稱的魯振順,日前接受范振鋒主持的電台節目訪問自爆婚訊,計劃明年迎娶41年前歌唱比賽認識的女同學,他更直言與女友拍拖僅數月便決定結婚,現已安排好新居,更希望婚後上天能賜予他們一個孩子。

魯振順昨日爆出婚訊後,令不少人感到愕然,因為入行40多年的他鮮有傳出戀情,外間甚至一度懷疑他的性取向。對於這段黃昏戀,魯振順昨日接受傳媒訪問,透露女友英文名叫Juli,年約50多歲,是他41年前一同參加歌星選拔賽而認識的女同學,二人拍拖僅數月便決定結婚:「佢都大年紀,我都大年紀,佢話我哋每個人都經歷咗好多人生唔開心嘅嘢,一見面就好似屋企人咁,好多嘢傾,佢成日都笑,見到我就成日笑,佢好開心、好正能量,大家開開心心過日子,又有共同目標、共同興趣,思想亦好脗合。」

部份人情做善事

問到婚禮詳情,魯振順坦言留待抗疫成功才會舉行:「我哋計劃大排筵席,到時我哋會唱歌,部份人情可能會拎嚟做善事, 所有嘢等女友負責,佢成日話要幫我爭返口氣,唔好成日都話我係gay!」言談間魯振順透露相信緣份,可能是媽媽安排女友來照顧自己,他說:「我阿媽喺2017年走咗,嗰陣經歷過一啲事,有叫過阿媽帶埋我走,不過佢叫我要好好活下去,唔好亂諗嘢,點知冇耐女友就出現,連佢都話可能係阿媽派佢嚟陪我,好直覺想見我,我第一次食佢包嘅餃子,一食就喊,因為同我阿媽包嘅味道一模一樣,感覺好warm,所以就更加珍惜。」女友的出現為他性取向平反?他說:「佢講咋,話幫我爭返口氣,感覺到我受嘅委屈,佢話你冇講到啫,但我感覺到。佢真係明我,呢個世界上好難遇到一個懂你嘅人,在我哋嚟講,係守得雲開見月明啩。」魯振順透露一直想組織家庭:「我一直都好渴望有一個家庭,冇遇人不淑,只係遇唔到,我之前見到陳榮峻同吳香倫結婚,我都好嚮往,唔知幾時先到我,可能呢幾年我釋懷咗好多嘢,所以上天安排我遇到呢段黃昏戀。」

未因黃昏戀受壓

談到生兒育女,魯振順笑言今個月底便64歲,女友也50多歲,雖然機會渺茫但仍抱有希望:「我都好鍾意小朋友,好多嘢好難講,可能上天畀我呢,一切順其自然,不過女友都講過可能會領養。」他又表示未有因黃昏戀而有壓力:「又唔係為人而生活,最主要我哋兩個健康健康,開開心心。」他希望能找到婚紗及禮服贊助:「拍劇就着過好多次,但屬於我自己就冇,點都要着。」魯振順多年來努力搵錢,被指擁有兩個物業,他透露女友的財力與他不相伯仲:「佢都搵到錢㗎,所以我咪話大家環境好平均,我仲驚人講話我黐佢㖭呀!」問到有沒有同居試婚?他認真地說:「冇冇冇,要尊重女方。我住我,佢住佢。其實已經搵咗間新屋,我哋各自都收藏好多嘢,屋企好似小貨倉咁,兩個都好頭痛,仲要斷捨離。」

范振鋒昨日接受《蘋果》電話訪問,坦言對魯振順自爆結婚感到突然,他說:「傾傾吓佢話𠵱家有拍拖,我哋都好突然,再傾就話會結婚,我反應係『吓』,我心諗緊係男定女呢?真係咁諗,跟住佢話女。」好友陳榮峻昨日接受傳媒訪問時表示,一入無綫已認識魯振順,對於一直有傳魯振順是同性戀者,陳榮峻說:「咁我知佢唔係gay,但從來冇聽佢講話拍拖,乜都冇,所以真係好突然。」

娛聞樂陪你走遍全球追星,即Like「娛果」FB 專頁!
BannerBanner