RB主音6號借歌詞寄意走過黑暗 「散聚」有時 放眼「未來」

更新時間 (HKT): 2021.04.03 22:02

RubberBand今晚在紅館開騷,以四面台面對歌迷,演唱會名為《RubberBand Ciao 2021 》,特地用上意大利文「ciao」,同時有hello及goodbye的意思,代表這次演唱會,主題講聚與散。早前6號受訪時,曾提及 ciao一字好適合2021年,因為無論香港或世界,都發生了很多大事。另一位成員泥鯭亦說:「我哋唔好講『聚散』,我哋要講『散聚』,將『聚』擺喺後面,我哋有一個信念喺度,可以用我哋音樂、文字喺嗰幾晚同大家分享我哋想嘅嘢。」

去年因為疫情,演唱會幾乎全軍覆沒,RubberBand今次開騷,搵初出道時已合作的小肥做和音,聚在一起玩音樂。6號在服飾上亦有心思,身上的外套在前胸、右臂及背部,分部有《許多年以後》、《脫逃》、《未來見》及《漫長》歌詞,又特別將「散」、「聚」、「未來」、「心」放大,另外有一個倒轉了的「罪」字,手袖上亦有「再見」、「夥伴」。

6號唱《阿波羅》時說,之前仍擔心坐不滿紅館,但今晚仍然爆場:「好開心你哋喺度。你哋大聲啲一齊唱。」之後接住唱《你和我》、《天台飛人》、《百毒不侵》及《漫長》,連續10首歌後,RubberBand正式向觀眾打招呼,6號以《漫長》中「說不出放棄」一句為香港人打氣:「香港人唔好放棄,做任何事都好,那怕細或大。我哋係平凡嘅4個人,之前搞咗音樂會,請咗好多big band、樂手一齊玩音樂。因為疫情令大家唔可以喺現場玩音樂,但而家實現夢想,雖然發生過好多不確定性嘅不順利,但而家仍可以喺紅館見大家,唔使再喺網絡上見。搞呢個音樂會叫ciao,人生聚散散聚來得突然,唔係要煽情,但而家啲樂手要同大家say ciao。」並介紹樂手離場。

當唱完《睜開眼》後,6號說:「呢首歌係2012年寫,9年來見證好多聚散,呢首歌好難唱落去,但我哋都盡量唱落去、同大家一齊。」

演唱中途,台上音樂人逐一落台並say ciao,當RubbeBand唱完《挾持》、《山河故人》及《倒行詩》後,6號說要講故事:「分開咗,好多時唔可以有時光機咁返轉頭,呢一刻好開心大家一齊喺呢度。」到《心照一生》時,台上只剩下RubberBand四子,最後更只得阿偉。他在台上多謝觀眾支持,他又多謝太太同女兒:「阿女今年6歲,小朋友呢一年轉變好大、佢6歲前鍾意RB,直情迷戀程度,但佢都鍾意小塵埃,話個主音同佢差不多年紀。6歲前佢嘅世界都係只得父母,突然間轉變好大,佢鍾意 BLACKPINK。畀我都會咁揀,小朋友、年輕人最緊要有得揀、冇得揀好慘,年輕人加油。」他獨唱了一首《G.I.》,是 6年前寫給阿女的歌。

其後所有音樂會成員再次上台,RubbeBand特別送上演唱會主題曲《Ciao》,6號說面對疫情的不穩定,隨時開唔成騷,但仍做了主題曲:「呢首歌未放喺任何平台派歌,喺呢度第一次唱,送畀呢塊土地上所有人。」RubbeBand亦有唱《逆流之歌》給去或留的人打氣:「無論大家去或留,或去新天地,無論點未來都係好、可能有困難、順或逆。」至於自身,他們說:「我哋係嚟自香港嘅RubbeBand,永遠都係。」RubbeBand亦有唱出《夏令時間》,稱:「有啲朋友因為某啲原因冇嚟,應承咗佢哋會唱。」

-----------------------------

蘋果初心不變!26周年「撐蘋果Tee」預售:

你的優惠訂購海外訂購按此

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner