【娛樂人物】富二代入行被酸足12年 
王梓軒將醋語食落肚

更新時間 (HKT): 2021.04.03 02:00

今年34歲的王梓軒入行12年,創作歌手出身的他近年涉獵的範疇多,從拍劇、主持到監製,去年疫情激發下,他投資六位數開網店賣粉絲創作的精品,近日再下一城,將自家創立的「酸葡萄」公仔與蛋糕店聯乘推出Shitto bomp蛋糕,可以扑爆發洩、可以食咗佢。富二代出身的他坦言出道以來嘗盡「酸味人生」,從網民的酸言醋語中學懂「自嘲」,更將它發揚光大投入生意概念。

撰文︰祖李

王梓軒去年疫情下停工八個月,積極學習幕後製作外,更投資網店開闢錢途,酸蛋糕因而誕生,他說︰「我喺網上搵到呢間甜品店用App已經教到你整蛋糕,我靈機一觸,就將同日韓籍漫畫家創作嘅『酸葡萄』卡通公仔Shitto Kun同佢合作。」他指酸葡萄是一種反向的正能量︰「現今世代,如果正面輸送正能量,大部份人都會話老土,酸葡萄係乜都唔抵得人,人哋越好佢就越唔開心,個樣好得意但把口勁衰,用負能量去發洩內心不滿,好似全世界欠咗佢!」扑爆酸葡萄蛋糕就正好配合情緒發洩。

藝人被當公眾財產

爸爸王英偉是香港藝術發展局主席,也是澳門「金沙中國」總裁,身家豐厚,王梓軒從小就得到良好教育,2008年畢業於美國康乃爾大學,出道已被稱為「有米新人」,這些年他不時承受酸民的酸風醋語,領悟到一招「自嘲化解法」。他說曾幾何時曾為這些不公平的輿論動氣,不過現在有另一番體會,「之前不時收到一啲惡意批評︰『你除咗乜乜乜,乜嘢都唔係!』有啲網民真係好mean(刻薄),但唔抵得人都係人性嚟。」

做藝人食得鹹魚抵得渴,王梓軒覺得一般巿民已經遺忘了藝人,也是有血有肉,「好多人覺得藝人係大氣電波或公眾設施嚟,佢當你冇感情,只係公眾財產嚟啫,所以佢哋可以肆意評論,就好似批評一座大樓,點解會起得咁醜樣咁啫,所以做藝人係辛苦,但明白咗就釋懷。」會否自覺真的贏在起跑線?他說:「龜兔賽跑大家都聽過,贏在起跑線含意好複雜,自負嘅人講通常會倒輸,出身窮講呢句又表示放棄咗自己、好消極,令人生嗰一萬個可能性咁就冇咗,呢句話係害人不淺。」他說做藝人最公平,金錢絕對不能造就觀眾喜歡你,「喺娛樂圈係靠才華至得到大家喜愛,最紅嘅都唔係有錢仔出身。」更大發金句︰「做畀你睇呢啲唔叫作為叫作狀,想你睇你又睇唔到嗰啲叫作廢。」

跟志偉開音樂節目

今年對王梓軒來說都是充滿挑戰的一年,除了拓展生意,曾志偉入主無綫後亦重用他開拓音樂節目︰「新音樂節目《演鬥聽》6月出街,係隊制音樂競技遊戲騷,每集會邀請唔同歌手上嚟玩,除咗plug歌,會同資深歌手合唱我哋改編過嘅歌,主要班底有作曲、編曲及填詞人。」

場地提供︰Bakebe

【冇得靠樣惟有做潛力股】

王梓軒將自己當股票投資,他自稱是潛力股︰「無論做歌手、藝員,我嘅內在價值,觀眾或製作人第一眼係睇唔到,好似音樂,到𠵱家我都好少出K歌,所以喺呢個巿場你要做好多唔同成績,先至會令人睇到你價值,加上我又唔係有型有款、口甜舌滑識交際嘅人,我有嘅只係創作,呢啲係隱形,所以我呢種係潛力股發揮空間大,我都唔敢短炒自己,要長揸至有信心大幅度升。」

娛樂事業王梓軒指如一盤生意,應該分散投資︰「初初只係識做音樂,就專注落呢個自己有信心嘅技術上,但呢樣嘢幫我打開咗度門,令我見到自己其他價值,分散投資係互補長短,喺唔同範疇成長。我拍劇兩、三年,已經有個角色hit過我最好嗰隻歌,呢啲係估唔到。」

娛聞樂陪你走遍全球追星,即Like「娛果」FB 專頁!
BannerBanner