鄧智堅坦承用「薑蓉」試水溫 外界反應比預期大:需要作出檢討

更新時間 (HKT): 2021.04.03 19:43

TVB日前搵嚟鄧智堅在綜藝節目記招上以「薑蓉」扮隔籬台ViuTV人氣男星姜濤,遭網民洗版式劣評,直指大台低質、老套又肉酸。當日有份笑「薑蓉」的林盛斌(Bob)等人急急認衰道歉,而被惡搞的姜濤對有人向自己道歉被嚇倒

取笑者及受害者都已出面,那扮演者鄧智堅又如何?今日他現身大台的節目錄影時,重提「薑蓉」事件,他承認有賽後檢討:「(外界反應)有啲唔係我預計,事後有諗返邊啲地方可以做得好啲,同唔同嘅部門可以溝通得好啲。我諗作為藝人、作為表演者,就算有冇呢啲聲音,每一次嘅表演,我哋都需要作出檢討。今次有咁大嘅迴響,無論係批評、鼓勵、關心嘅都好,我諗我都會去反思自己嘅表演。」

記者會只是小示範

問到當日的演出是跟稿還是即興爆肚?鄧智堅沒有肯定的回答:「其實係知道嘅,(扮薑蓉)嗰度只係其中一part,如果有留意,其實我哋啲同事都有模仿四大天王,或者有模仿一啲我哋流行嘅廣告,所以嗰個模仿係我哋節目中嘅其中一part。希望喺嗰個記者會只係做一個小小嘅示範,即係話我哋節目中其中有一part係扮嘢嘅,但其實仲有好多嘅遊戲、趣劇呀等等。」

被Fans「炸」社交平台

提到有很多「姜糖」(姜濤Fans)及網民到鄧智堅的社交平台洗版式鬧他不尊重偶像,鄧智堅坦承:「係囉,本身唔係好多人follow,突然間有好多人留言,或者唔同嘅批評呀咁樣,我都要聆聽,因為而家嘅世代同以前又唔同咗,社交平台大家又容易啲去發言,所以任何嘅意見我都覺得要聽。但係聽完之後要沉澱同消化,用時間、用行動去證明。」他又強調自己「每一次嘅演出我都會作出檢討嘅」。

對於外界的攻擊,鄧智堅指自己近排很忙,除了綜藝節目,還有劇在身,所以對外界的事,只是得個知字,他亦知道傳媒有大肆報道,但他明言眼前要先應付好節目中的比賽,並指比賽已為自己帶來很大壓力,所以不想再被外間的功力令自己分心。他強調自己已接收到所有意見,但需時消化,「我覺得呢一刻無論講啲咩都未必適合。」

-----------------------------

蘋果初心不變!26周年「撐蘋果Tee」預售:

你的優惠訂購海外訂購按此

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner