專訪丨康子妮積極賺錢求安全感 視前夫為永遠一家人

更新時間 (HKT): 2021.04.05 06:00

康子妮(Lily)與林曉峰(阿Lo)、大仔林寶和二仔林熙同樣是9月生日,一家似乎與9字有緣,就連被踢爆與阿Lo正式簽紙離婚,都是在去年9月大仔17歲生日當天,婚姻未能長長久久。

Lily日前在她的辦公室接受《蘋果》訪問,一開始已表明不想多談離婚事,她皺着眉頭說:「冇必要講,係我哋自己嘅事,咁公開影響到佢哋(兩個仔)我係最唔想。哥哥仲反過嚟安慰話:『唔係你安排』,我都好多謝佢哋咁成熟同明白,令呢件事冇咁差,舒服啲。」

感情從來是兩個人的事,但公眾人物不由自主,外界對此有好多揣測,有說Lily有第三者,又指阿Lo因疫情工作量大減,收入不穩成離婚導火線。對於負面批評,Lily沒有感到太委屈,反而冷靜面對:「我唔去研究,我今日做呢個訪問都驚,唔想再講,人哋會話關我咩事,兩個人嘅事,又唔係咩大明星。其實(問題)擾攘咗一段時間,大家協議咁行,我同父母交代咗,兩個細路仔都睇住,會明白,佢哋知道已經夠。」離婚後,前夫極速約女伴行街食飯,Lily想不也想便說:「梗係祝福,我希望我身邊所有人都好,佢都係我小朋友嘅爸爸、我嘅屋企人,從來冇諗過要佢唔好,佢有工作,有人讚佢,我全部都好戥佢開心。」

離婚後獨個兒搬走

結束18年婚姻,Lily一切重新開始,離開四口之家,康子妮搬出去,兩子跟爸爸同住,「係啲細路幫我哋揀咁樣安排,我哋都係共同撫養。」開始時總有點不習慣,但Lily佷快便適應一個人的生活:「自己住要段時間適應,喊?情緒實會有,但我唔怕一個人,以前喺加拿大讀書,父母喺香港,以前細佬又成日唔喺屋企,對住間屋2、3千呎,外國係好大嘅,慣咗自己照顧自己。TVB時代都係自己出去拍嘢,冇話驚自己一個人。」

那年,25歲嫁人,對婚姻充滿憧憬,今天44歲經歷失婚,Lily自言無悔早婚:「冇話早定遲,以我阿媽年代叫好遲結婚啦,我慶幸有小朋友,現在都高過晒我啦,我可以同佢哋出街,唔使再好似湊BB咁,呢個age gap幾好。」在媽媽眼中,兩個仔好生性、懂事,現今Lily努力工作的原動力都是為他們:「我而家人生目標就係要供個仔去佢哋理想讀嘅一間大學,有貴有平,同佢講唔好去英國(最貴),哈哈。其實唔止我,Daddy都辛苦(搵錢),好清楚我哋係好錫佢哋,想畀最好嘅,所以不嬲都生性,有啲嘢好想買都會勒住勒住。」

Lily自少不愁衣食,父親是一名銀行家,小學未畢業已赴加拿大讀書,大學就讀加拿大頂尖學府多倫多大學,修讀音樂系,16歲已是鋼琴演奏級,畢業後曾擔任音樂及鋼琴老師,並在加拿大新時代電視開咪主持節目,2000年放棄加拿大的事業,回流返香港加入TVB,並認識了阿Lo,婚後退居幕後,相夫教子。「嗰段時間我都唔係搵唔到(錢),只係我唔講,我做好多幕後嘢。讀咗咁耐音樂,都要同爸爸媽媽交代,我有編曲、編譜,教咗10年鋼琴,亦有演出(唱和音)同做好多比賽嘅評判,以前做演藝工作都唔少錢。」

收入不穩缺乏安全感

雖然瓣數多多,但Lily漸漸發覺收人不穩定,缺乏安全感。兩年前,她為容祖兒演唱會唱和音,巧合遇見相識廿多年的大學同學Garry,對方游說她加入保險行業。「疫情停咗好多工作,令我多咗時間諗嘢,無論健康或家庭方面,唔係冇晒嘢做,仲有做啲KOL,但發現唔穩定,同Garry傾多咗先發現自己好迷失,我知自己要income,但結果係match唔到。」一開始仍要突破心理關口,「有擔心過藝人身份點做,後來諗通咗,我對客同朋友都一樣,身份冇衝突。」而阿Lo更成為她的首位客人,大仔就是第一個claim保險客,她苦笑說:「我個仔俾狗咬,做咗唔係耐,就要學填claim form,一星期就有錢。」

提起緋聞,Lily反覺得對Garry不好意思:「我哋係一個工作關係,突然帶呢啲麻煩畀佢,在佢嘅工作層面都會有影響,但唔會去解釋或者點樣,因為唔係事實,但我哋暫時都處理得幾好。」至於黃翊,她只用有趣形容,因為不想牽涉別人家庭,所以避談,現在只想將重心放在工作上,做保險經紀之餘,還可以做KOL、音樂,早前還幫ViuTV拍實況節目,她形容:「揀呢行係perfect,搵到安全感(錢),又可以做自己喜歡嘅嘢,自己安排時間。」

-----------------------------

蘋果初心不變!26周年「撐蘋果Tee」預售:

你的優惠訂購海外訂購按此

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner