農夫憶靈異經歷丨C君英國開工見女鬼耷低頭望陸永:我呆咗!

更新時間 (HKT): 2021.04.05 18:47

「農夫」C君及陸永近年撈到風生水起,多得Do姐愛錫,又有麥玲玲指點迷津,自然趨吉避凶。日前他們上麥玲玲及林盛斌(Bob)主持節目,麥玲玲笑指當年有提攜他們,更讚C君文筆好,視C君為徒弟要傳授玄學風水命理,而麥玲玲回想當年在電台做節目而認識農夫,初次見面心想「錄音室咁雜」,更大爆農夫出道時好窮,連她也忍不住叫農夫轉行,不過他們堅持做Rapper。

行內人常說娛樂圈邪門、撈偏門,往往容易有怪事傳聞不脛而走,麥玲玲自認大膽,就算到馬來西亞雲頂也主動要求住酒店尾房,陸永稱他們出埠開工,通常一人一間房,有次去雲頂開工卻只安排一間大房,陸永回想:「間房好大、幾闊落,我哋揀咗套動畫嚟睇,已經唔係驚慄片,睇完熄燈去瞓,豈料忽然聽到廁所個電子感應式垃圾桶,不斷開閂,而且個節奏已超越咗個感應,好快!當時我哋同樣感應到一系列嘅聲音。」

C君忍不住爆粗大鬧,未幾聲音就停止,二人以為沒事繼續瞓,然後陸永就聽到有跑步聲由遠至近傳過來,陸永續道:「成個類似小朋友重量嘅嘢跳咗上我個肚度,望住頭上只有一大片黑色嘅嘢籠罩住,當時個心唔算太驚,覺得『佢』係小朋友,就念經叫佢走啦!但唔係傷害『佢』嘅,感應到『佢』去廁所好似撞車聲咁大聲『啪』,但C君竟然咩聲都聽唔到。」

陸永稱每次同C君同房都「出事」,有次他們到英國開工拍攝,陸永在房內玩平板電腦,C君睡眼惺忪,突然想去廁所,C君一起身望向陸永時,流露出奇怪眼神,C君解釋:「我見到有個女人耷低頭望住佢,我呆咗呀!半夜起身以為自己矇查查,去完廁所之後又唔見咗。點知第二日有個攝製隊同事話喺走廊見到個紅衫女人行,轉彎走去搭𨋢位置就消失咗,嗰個人嚇到唔敢去跑步。」

之後他們講起「凶宅」,陸永和C君搞笑說在香港凶宅都買不起,連麥玲玲也笑稱對凶宅有點怕,麥玲玲指當年師傅要求她跟師兄去處理凶宅問題,原來該戶主墮過胎,亡魂留在宅內,未想到師兄堅稱只留在門外,叫她一個入內,麥玲玲稱每次到凶宅也有感應,有時會覺得頭痛。

Bob亦分享睇樓經驗有次到九龍塘一間豪宅,見租金比同區平一半,後來問附近看更才知該豪宅左邊有佛壇,又有佛堂,最終師傅叫他最好另選住處,麥玲玲解釋:「廟前窮、廟後富、廟左廟右出寡婦,口訣係咁。」此外,麥玲玲試過買「離婚屋」,幾乎每個租戶都離婚,她則只出租沒自住。

-----------------------------

蘋果初心不變!26周年「撐蘋果Tee」預售:

你的優惠訂購海外訂購按此

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner