ViuTV五周年台慶丨杜琪峯講錯「Miller」 睇MIRROR演出大讚:香港創意工業有希望

更新時間 (HKT): 2021.04.06 17:51

今日ViuTV五周年台慶,一班旗下藝人歌手到場演出,香港本地男子跳唱組合MIRROR出道兩年多,每次他們現身均聚集大批fans,為見偶像一面,甚至租車追星,不過近日人氣王姜濤就在Telegram(TG)給fans寫長文,透露家人受到滋擾,以及MIRROR拍攝節目受阻等,事件卻觸發關公災難,有指姜濤疑焫著姜糖,令部份姜糖嬲爆稱「姜糖捧得紅你,都可以踩低你」,為怕此事鬧大,連一向甚少發言的「花姐」黃慧君也在IG以長文回應。

強尼做和事佬

今日ViuTV台慶節目上,MIRROR以壓軸表演嘉賓現身,擔任司儀的強尼似有意緩和近日部份fans的不滿情緒,他先開玩笑說近2、3年環境轉變好多,以他自己經歷來說,近日出街時多了一班後生女好熱情走近打招呼,並問:「有冇MIRROR演唱會飛?」

強尼再舉例指過去1、2年每逢穿過商場返錄影廠工作時,便勾起一個畫面,強尼哼出歌詞「領導樂壇靠晒你哋 冇咗你哋我哋會死」,他說:「原來歌詞內容並非都市傳說,雖然而家廣播道只係得豪宅,但fans從來冇死,正如杜Sir(杜琪峯)話香港電影唔會死,香港樂壇、香港電視都唔會死。我會咁形容我哋行業而家經歷轉世,ViuTV願意做最大產房,我哋希望為所有新星接生,作為產房,我哋目標希望佢哋全部能夠順產,可以健健康康咁成長,去面對佢哋嘅fans,咁多位fans你哋預備好你哋嘅歡呼聲未?」

一眾由ViuTV打造出來新星陸續現身上台,先是《全民造星III》頭三甲趙祥誠(Ben)、陳葦璇與陳毅燊(ANSONBEAN)先後上台表演,接着強尼問現場有冇人買到MIRROR演唱會門票,不如而家抽MIRROR飛?即令全場歡呼拍掌,強尼續說:「派乜鬼。現場唱畀你哋聽啦!」MIRROR現身表演壓軸登場。

杜Sir講錯「Miller」

開台當日有份出席啟播禮的大導杜琪峯(杜Sir)再度上台,杜Sir一向妙語連珠,睇過ViuTV出身的組合MIRROR演出後大讚,杜Sir雖然講錯MIRROR變「Miller」,但他笑言見到班年輕人演出,覺得香港創意工業有希望,並向ViuTV董事總經理魯庭暉傾合作機會,即場舉行合作儀式。

杜Sir上台致辭時,指看到今日演出的藝人,回想自己當年入行的時光:「我覺得上到嚟真係好似時光隧道咁樣,我嗰陣讀訓練班就好似你哋咁樣,嗰時1974年嘅時候,我覺得呢個日子,過去5年,ViuTV喺電視界裏面,真係叫做闖到出嚟。我睇咗今日嘅節目,真係覺得新一代真係好有機會,當然啦,最尾壓軸嗰個叫Miller?我都唔知咩叫Miller,佢哋真係唔同,比我想像中唔同。」全場有不少人聞言歡呼鼓掌。

早已投身電影界的杜Sir坦言,近年見到新人輩出,亦帶動好多香港新電影出來,他深信日後會有更多好電影陸續出現:「今日睇到ViuTV咁年輕、咁多生力軍,電影界咁多生力軍,我覺得香港嘅娛樂事業、創意工業都好,係好有前途嘅,我梗係唔執輸!」

而杜Sir所謂「唔執輸」,原來他與魯庭暉傾合作,而魯庭暉答應,杜Sir笑言:「我梗係好高興啦!因為如果有得搞的話,即係我有得撈吖嘛!多謝你魯生。」杜Sir的妙語引得全場大笑。隨後在台上舉行儀式,正式宣佈合作。

MIRROR恨拍黑社會喜劇

對於杜琪峯在台上將MIRROR叫錯為「Miller」,MIRROR對於新名大表滿意,笑指MIRROR可能稍後會改串法,問到會否想跟杜Sir合作?MIRROR興奮地說:「梗係想,相信係全台人夢寐以求嘅事情,全港藝人都想有呢個機會。」至於想杜Sir開甚麼題材電影給他們參演?他們議論紛紛:「最好杜Sir開套喜劇畀我哋12個人拍,或者係黑社會嘅喜劇。」

其實杜Sir與魯庭暉去年曾被《蘋果》拍到他們一起上杜Sir老友古天樂隻遊艇出海,當時已有傳魯庭暉打算拉攏各人度橋救港劇撼大台。

-----------------------------

蘋果初心不變!26周年「撐蘋果Tee」預售:

你的優惠訂購海外訂購按此

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner