RB尾場三度Encore丨6號含淚唱出「約定再見」 感謝曾俊華捧場:好有緣

更新時間 (HKT): 2021.04.07 10:58

樂隊RubberBand(RB)昨晚於紅館舉行《RubberBand Ciao 2021》演唱會尾場,許廷鏗、田蕊妮、徐天佑、方力申、卓韻芝與老公、組合C AllStar的釗峰和On仔,樂隊MR.的Tom捧場,演唱會準時晚上8時半開騷,當RB四子上台後,全場觀眾以掌聲歡迎。在唱《醒未?》時,全場觀眾在原位站着,隨着拍子起舞,high爆全場。在唱到《阿波羅》後段時,觀眾也跟住和音「啦啦啦」,6號忍不住說:「好聽,黐線!」當三位隊友返回後台,輪到泥鯭solo,全場觀眾拍手掌,他笑說:「一個人幾好,一個人享受掌聲係好開心。」

他又指沒戴口罩,所以只能沿着台邊,流水式跟觀眾打招呼,「我想用僅餘嘅記憶去記住呢個畫面,因為唔知下次仲有冇機會。」泥鯭笑言是全隊Band最多說話的一個人,但又經常講多錯多,令隊友及公司同事替他擔心,泥鯭即場向他們道歉,驚自己多說話而超時被罰錢。對於演唱會以「散」、「聚」為主題,泥鯭說:「走吓一個,走吓又一個,個騷好沉重,但諗真啲,又唔係咁沉重,至少我仲生勾勾,我仲有家人、朋友、隊友、仲有同路人,我哋互相扶持,無論幾難嘅路都可以一齊行落去,所以面對散,我哋唔需要太傷感,我哋聽日返到去正常生活,不過香港都冇乜正常生活可言,anyway,我哋返到崗位後,我哋要懷住珍重嘅心去迎接每次聚首,我覺得咁樣先至可以好瀟灑去迎接每一次嘅別離。」

然後泥鯭自彈自唱《你會有一天學會面對》,泥鯭唱完即大叫「香港人!」觀眾回應:「加油!」四子重聚獻唱《逆流之歌》、《發現號》時,6號大叫:「香港人加油!」唱到《未來見》,6號表示希望未來可以跟大家除口罩相見!當四子返回後台之際,全場觀眾示意要Encore,沒多久他們再返回台上,6號笑說:「唔講咁多!」接住即唱《你和我》,6號表示是最後一首歌,並與所有人大合照,但全場觀眾仍不肯離場,繼續大叫「Encore」,四子再度出場,6號哈哈大笑說:「其實紅色假期已經完,大家聽日要返工㗎!我哋唱多一首好唔好?」觀眾回答他:「唔好!」RB就獻唱《夏令時間》、《Easy》、《Simple Love Song》,最後以《Ciao》結束演唱會,當唱完「說了再見,約定再見」時,6號忍不住喊起來,觀眾離開時亦大叫「加油!」

受訪時,他們表示這四場演唱會很感動,6號指歌詞令他聯想很多事,尤其是亡母,笑言要隊友安慰,阿偉說:「佢今次已經好叻,以前開一晚騷都喊幾次。」提到近年有朋友left group,所以感受很深,6號續說:「有個朋友同另一個朋友嗌交,你會覺得好無奈,所以唱《山河故人》會聯想到嗰位朋友。」泥鯭指自己當6號唱《夏令時間》都喊過,因在長大過程中感受到唏噓。甚少說話的阿正,他看似很硬淨,但其實亦被今次演唱會感動,他說:「我係比較難喊嘅人,但都有感動到我。」

問到有否想過開part 2?阿偉稱現時只想休息,6號笑言這刻想吃雞煲,泥鯭說:「成個騷都逼埋喺一個月,所以不論體力上、精神上都攰,都需要休息。」提到他們所穿着的外套印有不同歌詞,花盡心思,泥鯭說:「係呀,因為有好多歌詞、圖案,我諗入嚟嘅觀眾都會有共鳴,尤其是熟讀我哋歌詞嘅朋友。」他們坦言享受這個演唱會,阿正笑說:「4晚先warm up到,但咁就完咗喇!」

對於前財政司司長曾俊華欣賞首場,更引用《未來見》歌詞,寄語大家要抱有初心,6號說:「好感謝佢嚟,我哋之前接受過佢嘅訪問,嗰刻我哋做咗朋友,我哋好有緣,之前都喺電台相遇過,所以邀請佢嚟,我哋好開心㗎,因為佢係長輩,引用我哋一句歌詞,喺心中嘅一句說話,時勢越嚟越艱難,我諗佢都係想同大家共勉,好開心佢都會聽流行曲。」他們指平時跟曾俊華都會聊音樂,對方曾是Band友,有否考慮一齊jam歌?泥鯭笑說:「我驚我哋未夠資格!」

-----------------------------

蘋果初心不變!26周年「撐蘋果Tee」預售:

你的優惠訂購海外訂購按此

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner