汪明荃認同TVB老化嚴重 自揭「我都好少睇劇集」

更新時間 (HKT): 2021.04.07 18:25

TVB大股東黎瑞剛接受傳媒訪問,狠批TVB團隊及節目老化、內部山頭林立、管理層決策失誤,黎瑞剛坦言對大台「不滿意,不滿意,而且是非常不滿意。」身為TVB鎮台之寶的汪明荃,亦曾多次為藝員發聲,直指公司充斥山頭文化。今次連大老闆黎瑞剛都爆seed,汪阿姐接受《蘋果》訪問,她表示同意老闆的批評,直言自己睇TVB節目都是「睇煮餸睇到悶」,近年已很少睇劇集。

汪阿姐縱橫電視圈多年,地位夠高的她一向敢言,對於老闆提出的五大缺失,汪阿姐表示,「我覺得的確有啲地方同意,山頭太多,來來去去都係嗰班人,好多人冇機會,我覺得藝員係公司財產,啱就要用,以前casting係向製作部推薦藝員,而家調番轉,鍾意嗰個簽返嚟先,其實藝員部同製作部要緊密合作,將最大功用發揮,而家少咗好多偶像。音樂節目方面都係好可惜,嘉賓嚟唔到,唔夠全面。」

至於黎瑞剛提出的老化問題,汪阿姐指老化包括很多方面,全部問題都要改善,直言自己睇煮餸都睇到悶,「晏晝、晚上乜節目都加煮餸,好悶,所以嘗試新嘢係好,要畀人新鮮感,好唔好冇所謂,都要試,要年輕要多元化,近年我都好少睇劇集,主要睇新聞,個個台都睇,CCTV都有睇。」

汪阿姐指現在睇電視有好多不同方式,包括用手機和iPad都可以睇到電視節目,「所以要針對年齡層和觀眾群組作出改變,否則改唔到特色,TVB底子係好,曾志偉入嚟,外面大卡士肯入嚟幫手,最大感受自己嗰日錄節目,隔鄰廠有余安安、袁詠儀做節目,大家支持TVB,好開心,希望做一個好騷,大家要針對問題,大老闆開到聲,舊人要upgrade,我都不斷學新嘢,我支持公司。」

在邵逸夫年代的TVB曾叱咤電視圈,惟自陳國強入主後,高層余詠珊、杜之克、曾勵珍、樂易玲各據山頭,2018年台慶頒獎禮上,汪阿姐致辭時代全台發聲:「希望公司可以好好咁珍惜我哋每一位,雖然我哋個個都好搏、好捱得,不過如果公司嘅人工可以加多啲,休息嘅時間可以加多啲啲,關心多啲啲,山頭文化少啲啲,一定可以發掘同埋挽留到更多嘅人才。」

-----------------------------

蘋果初心不變!26周年「撐蘋果Tee」預售:

你的優惠訂購海外訂購按此

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner