Baby師妹劉沛蘅憑《膠戰》彈起 曾志偉新抱仔帶挈入行

更新時間 (HKT): 2021.04.07 06:00

娛樂圈經常有新面孔登場,除了藝人外,素人、KOL近年亦搶佔市場一席位,令競爭日趨白熱化。比起男藝人,女星的演藝生命有限,要懂得持續站在浪潮上,便要懂得自我求變。今年29歲、model出身的劉沛蘅(Hillary),13年前出道時,挾着Angelababy師妹之名,亦有「翻版薛凱琪」之稱,過往影硬照、拍廣告手到拿來,但直至近年,Hillary開始涉足電視、電影甚至綜藝節目,在ViuTV的搞笑節目《膠戰》中,成為固定主持,由索女搖身一變成為網民口中的「索膠」。

觀眾批「可有可無」

適者生存,在風高浪急下,要「求存」,必須懂得「求變」。要轉型,就需要一個契機,Hillary日前接受《蘋果》專訪時,自認慢熱轉數不夠快,當初《膠戰》出街時,曾被網民批評在6個主持當中,是「最可有可無的一個」。慶幸到後期,Hillary終獲外界接受,即將開拍的《膠戰2》,可以原班人馬一起拍攝。「其實開拍節目前,6個主持有唔同定位,如果個個定位都係得個『嘈』字,就會好煩,咁我定位係屬於文靜型,事實上亦冇其他主持咁識搞氣氛,最初觀眾覺得我冇乜出聲,又唔係特別靚,開心嘅係我同其他主持熟咗之後,玩得亦放咗同癲咗,觀眾到後期都慢慢接受咗,睇到我嘅長處。」

講起《膠戰》主持,當中MIRROR成員呂爵安(Edan)被捧為ViuTV新寵,人氣直迫隊友姜濤,Hillary欣賞Edan的才華,卻更讚結婚不久的岑珈其對老婆的深情。「拍呢個節目,我哋幾個都熟咗,開埋WhatsApp group吹水傾偈約食飯,珈其真係好錫老婆,一收工就話要返屋企搵老婆,其實肥腸(徐浩昌)玩遊戲時都好識照顧身邊嘅人,係一個暖男嚟!」

自認走得比人慢

10年過去,Hillary由當初小師妹,變成現在是公司的大師姐,面對公司旗下一班小師妹蠢蠢欲動,Hillary承認自己的演藝路確實比人走得慢。「做呢一行,真係好靠天時地利人和,你問我心唔心急?有冇一刻氣餒過?咁梗係有啦,拍劇嗰陣,見到其他人已經係熟手,佢哋知道自己做緊咩,走位睇cam完全冇難度,相比其他人,自己好似一張白紙咁,覺得自己好渣。不過我都幾有信心之後條路會好好,可能以前做model,但而家冇咁多job,咪努力去做一個演員囉,做人只要肯嘗試,點都有條路畀你去行啩!」

為了求變,Hillary曾有一段時間以性感少布形象換取人氣,卻慘被媽媽鬧她是「暴露狂」。「媽咪好驚我俾人呃,成日話我蠢,話『阿妹都醒過你』,其實我知媽咪係錫我嘅,佢唔想我咁性感啫,我平時出街同我上鏡差唔多,一係貼身少布,一係闊袍大袖,好少fit size,至於拍戲角色嘅底線,總之角色需要我都OK嘅,哈哈,但就算我肯露前面都冇嘢睇,好多人有料過我啦!」

童顏有利有弊

回想入行經過,Hillary坦言多得TVB高層曾志偉新抱仔王敏奕帶挈。原本可以和細妹組成「真Twins」出道,卻因胞妹太怕醜,最終只得Hillary單飛出道。「阿妹同我讀同一間中學,佢細我一年,我讀Form 3嗰年,王敏奕同我個妹讀同一班,有日佢問我同阿妹有冇興趣去見model公司經理人(現時Hillary的經理人Kim),咁我媽咪就話如果要簽就要兩姊妹一齊簽,但要等我哋畢咗業先,其實阿妹第一次見完之後已經話呢行唔啱佢,佢太怕醜同保守,就連我同佢影相佢都覺得尷尬,我調返轉,好鍾意俾鏡頭影嘅感覺。」

擁有一張baby face的Hillary,坦言童顏某程度上可以延長演藝生命,可惜當中有利有弊。「後浪推前浪?咁最緊要大家有唔同market啫,出面啲人都覺得我比實際年齡細,接廣告job會有着數,不過童顏亦有一個致命傷,就係規限咗演員角色嘅可塑性,即係例如有一個成熟強勢嘅角色,你個樣咁細路女,就好難說服到人,有幾次試鏡,就係因為我個樣畀人感覺太甜太幸福,唔適合個角色而冇被取錄。」

----------------------------

蘋果初心不變!26周年「撐蘋果Tee」預售:

你的優惠訂購海外訂購按此

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner