楊思琦車禍後首現身 感頭痛需服藥入睡

更新時間 (HKT): 2021.04.08 16:52

楊思琦、阮小儀和康子妮等,早前拍攝ViuTV節目《中女唔易做》,今日在葵芳宣傳。早前遇交通意外的楊思琦首日開工,表示仍會間中出現頭痛症狀,有時嚴重就要服藥才能入睡,醫生指她拉到頸椎,要慢慢康復,她亦有針炙,雙管齊下。

楊思琦回想車禍感慶幸:「當時有車攔腰撞埋嚟,仔女同我阿媽都喺架車,平時阿女坐車鍾意靠窗邊,好彩嗰一刻佢冇咁做,如果唔係撞力會好大,好幸運。」事後女兒被嚇親,楊思琦有不斷安撫她,因此事有些工作被迫取消,問到丈夫可有分擔平時工作,如照顧小孩及做家務?她未有正面回應:「休息一星期都係屋企瞓,因為都仲有頭暈,屋企人有幫手,都想我休息多啲。」

小儀在節目中當農夫,兩日拍攝種菜和收割。節目內沒遇到靚仔。最近拍攝節目有不少艷福,先被兒時偶像蔡一傑錫臉,又可與MIRROR身體接觸,這次齋做似乎對她是大懲罰,她說:「之前食晒MIRROR同ERROR夠飽,可以冬眠儲糧。」在節目內與MIRROR有許多身體接觸,強調只是節目效果更狂呼無辜,她說:「唔好講到我女色魔咁樣啦!但想摸嘅都摸晒,無憾喇,出自傳都得。」

扮鄉音阿姐落單「先菜」

康子妮在節目內要當餐廳侍應,在餐廳內更借模仿其他「姐姐」發音不正,餐廳侍應獨有鄉音考起她:「如果刻意學去講嗰啲話係好難,搞到我好緊張,練咗一陣就要拍。最難係連落單部機,食物名都變晒,好似酸菜係寫『先菜』,其他人覺得簡單,我就話好複雜。」她另要應付沖製飲品,兼且洗碗,忙到一頭煙但仍被覺得手腳慢被催促。拍攝2日笑指打工沒另收酬勞,她指從未幫襯該食店,反而她兩個兒子經常光顧,推介她一些食物,「原來平時放學佢哋去Chill吓,經常去嗰間舖食嘢」。

-----------------------------

蘋果初心不變!26周年「撐蘋果Tee」預售:

你的優惠訂購海外訂購按此

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner