陳倩揚被指做「怪獸家長」谷兒子幾個月考小提琴五級 網民:之前又話唔chur

更新時間 (HKT): 2021.04.08 12:49

香港近年不少怪獸家長一時希望「贏在射精前」恨生大B,等仔女有機會搶先入讀心儀學校,霸定個靚位後,然後又要谷啲小朋友必須贏在起跑線,十八般武藝樣樣精,為人父母自然想將「最好」給予小朋友。

噚晚有網民忽然喺一個家長群嘅facebook專頁爆料,稱某女藝人司儀為催谷兩個囝囝入「名男小」,要求樂器老師用幾個月時間去教兒子學五級考試歌,傳囝囝最後成功插班入「名男小」,又指「唔好見呢位女藝人司儀平時冇嘢咁,之前又話自己唔chur兩位公子,實際上不知好chur,而且機心好重,唔好畀佢呃到大家」。呢位網民更附上一條link顯示一間音樂學校FB嘅post,寫住陳倩揚寶貝仔陳羲廷(Auryn)跟隨本校小提琴主任學習僅數個月,於今年2月考英國皇家音樂學院五級小提琴並獲得Merit「佳績」。

網民讚小朋友有天份

此post引起不少家長討論,有網民指現時有啲學校可以只谷4首歌就去考試,另有網民留言批評陳倩揚,「形象嘅嘢,大家明啦」、「平時出Live都感覺到假同不停帶貨,利申已經冇再睇佢嘅Live」、「朋友個朋友識佢老公,我信」等。不過有網民就覺得要谷到個仔考到5級,本身小朋友都要有天份:「如果一個小朋友冇天份,點chur都無用」、「證明佢小朋友小手同睇譜都幾叻」,另有網民好奇「因為咁眼紅佢個仔?唔抵得人哋入到」、「佢搶咗你插班生個位」。

陳倩揚:哥哥一教就明

陳倩揚今日回覆《蘋果》否認自己係「怪獸家長」,佢話:「網上呢啲要靠大家自己去判斷,佢哋又唔認識我,又唔係同我哋一齊生活,最重要我知自己點樣,同小朋友嘅特質喺邊。」現就讀小學四年級嘅大仔,由小一已開始學習拉小提琴,直至去年中經朋友介紹Samuel Sir,令囝囝成績突飛猛進,倩揚話:「梗係唔會幾個月就考到五級,可能有啲小朋友幾個月得啦,但其實哥哥一年級行過琴行,之後話想學,嗰時佢好細個,係興趣班咁同佢輕輕鬆鬆,佢喺自己學校樂團都玩咗四年,真係多得呢位老師啟發到小朋友,哥哥話好鍾意佢,一教就明。」

而6歲嘅弟弟同樣有學拉小提琴,但只是BB版,佢笑住話細佬都想學打鼓,但因為興趣太多要再安排時間,佢話:「佢哋仲有踢波、游水、畫畫呢啲課外活動,弟弟仲話想學打鼓同跆拳道,但我都話暫時未安排到,因為想留多啲時間畀佢哋free play。」問到係咪想催谷小朋友入讀名校?佢話:「Day one都冇透露小朋友讀邊間學校,想佢哋開心學習,但作為家長都希望因才施教,多謝大家關心。」

陳倩揚2008年參加香港小姐奪亞軍入行,曾做《東張西望》主持,拍過TVB劇集,2015年離巢做開心靚媽,結束7年賓主關係,佢跟老公結緣於中文大學,拍拖8年即拉埋天窗,婚後誕下2男1女,陳倩揚偶爾要工作,反而沒時間陪小朋友,有時要老公幫手湊小朋友讀興趣班。

-----------------------------

蘋果初心不變!26周年「撐蘋果Tee」預售:

你的優惠訂購海外訂購按此

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner