李璧琦龔柯允獲陳友親身授教演戲 請食海鮮代替學費

更新時間 (HKT): 2021.04.08 19:06

陳友、龔柯允(Karen)與李璧琦(Becky)前年年底合演一部寫實電影《等一個擁抱》,作品將於本月中上映,3人日前於荃灣接受訪問。劇情講述患有腦退化症的爸爸,為了年青時因婚外情而拋妻棄女的事,希望在仍有記憶之時找回2女,向她們親口道歉,彌補心中遺憾。

陳友演腦退化父親

從未演過腦退化角色的陳友,直認角色非常有難度,問到身邊可有患有腦退化症的人作參考時?陳友笑說:「拋妻棄子朋友又少,腦退化症朋友就仲少,因為我哋相對未去到嗰個年紀,但朋友爸爸媽媽有腦退化情況都有,但係都唔多,我都搵到一啲例子。其實我媽媽都係腦退化過身,但我媽媽情況係無嘢講,但做戲如果吽吽哣哣唔出聲,導演唔出糧畀你,一定要喺真與假之間,唔知幾時講真,幾時講假先好玩啲,然後點喺裏面搵到感動點。」陳友指最後參考了一位世伯情況,對於鍾意的事就記得,不鍾意的便選擇忘記,看醫生時就好精靈好乖,但返到屋企就詐病詐嬌,他說:「我喺戲入面就參考咗,打牌輸咗唔認數。」

戲中飾演大女的Becky得知爸爸患病後,便放下仇恨陪同爸爸回到充滿回憶的大澳舊居,Becky收到劇本時已有共鳴,因她本身在沒有爸爸的環境下成長,婆婆離世前也患有腦退化症,所以拍攝時不時流出真眼淚,她說:「喺友哥身上學到好多嘢,同佢做手戲時會被佢引導我。」

Becky請食海鮮代替學費

至於如何報答友哥,Becky指請食海鮮,大部份拍攝時間於大澳取景,她說:「埋位時當大家嗌『友哥、友哥』,就發現佢喺河邊望落啲艇度話『我今日要乜魚、今日要馬友』。」Beckhy笑指「爸爸」買魚便叫「阿女」畀錢先,全因陳友埋位時身無分文,而Becky每次都動用電話殼內的救命錢埋單。身旁的陳友一臉滿足笑說:「乖女,大澳拍嘢有度好,海鮮好靚,我又成日冇帶錢喺身,每次都叫阿女妳畀錢啦,大女就負責畀錢,好乖。」

至於飾演細女的Karen戲中未能原諒爸爸,因而不時大鬧爸爸,她尷尬說:「戲中我要好惡鬧佢,但現實生活中友哥係大前輩,其實(演出時鬧)慣咗,喺戲外我有時都對佢無禮貌。」陳友指Karen屬於年輕演員,身為老戲鬼的自己會不時分享自身經驗,而Karen也非常聰明很快上手,Karen說:「有場戲,友哥叫我乜都唔使做,望住佢就得,然後佢講一個心痛經歷,跟住我就聽到開始喊,Off Cam繼續喊到傻咗,當時先知原來演戲係咁有感染力。」

髮型:Simon @ leighton aveda(李璧琦)

服裝提供:Novelty Lane(龔柯允)

-----------------------------

蘋果初心不變!26周年「撐蘋果Tee」預售:

你的優惠訂購海外訂購按此

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner